ORANJESTAD – Durante un conferencia di prensa cu minister presidente Evelyn Wever-Croes tabatin diaranson pasa, el a reitera cu e situacion di e crisis migratorio di Venezuela y su impacto pa Aruba ta un situacion hopi dificil y delicado.
El a splica cu ta trata di hendenan cu ta busca un miho posibilidad of porvenir. Ricibi nan cu brasa habri, yuda nan para bek riba nan pia, y e muchanan cu ta pasa hopi momento dificil, manera prome minister a bisa ‘nos no por haci esey’. El a expresa cu Aruba no ta den e posicion pa haci esey, y nan ta busca e manera intermedio.
Di loke ta trata e situacion cu dianan pasa a sucede na Warda nos Costa, di e personanan di nacionalidad Venezolano cu a publica varios video bisando cu nan derecho como ser humano ta wordo viola, prome minister a expresa cu e tin plania un reunion cu nan, pero prome e mester papia riba e tema cu minister di Husticia Andin Bikker, pa trata e situacion preocupante aki.
Di mesun manera, Wever-Croes a manifesta cu ora ta trata di derechonan humano ta un tema cu nan mester verifica, y pa via di esey, nan tin un comision separa cu ta bay trata riba cada caso mes, pa motibo cu ta e unico manera.
“E situacion no ta facil, nos tin un facilidad demasiado chikito pa tanto hende” el a sigura. Di loke ta trata e hende cu ta ilegal, el a bisa cu esey tin su repercusion tambe pa motibo cu loke a sucede na Corsou e siman pasa, di laga bay un grupo di hende, ta un factor peligroso pa motibo cu esey ta motiva mas hende pa bin subi riba boto cu tur e consecuencianan y riesgonan, y esey ta loke gobierno kier evita.
Wever-Croes, kende dianan pasa a sostene un combersacion cu e presidente di Asamblea Nacional Venezolano, Juan Guaido, a agrega cu el a bisa pa Guaido cu ‘nos ta convivi, pero e ta un peso enorme pa un isla chikito manera Aruba, y ta conveni nos pa nos tin un resolucion di e situacion’, el a finalisa.
