Santa Cruz ta un di e poco barionan cu ainda no tin un Centro di Bario. Prome Minister Mike Eman durante di un ceremonia special na Santa Cruz na veld di Rockets, pa instalacion di un batting cage pa e ekipo aki, a institui tambe, den un Decreto Ministerial, un grupo di trabou, cu ta keda encarga pa haci un estudio cu tin como elementonan principal: e posibilidadnan pa bin un Centro di Bario pa Santa Cruz.
E grupo di trabou ta consisti di e siguiente personanan: sra. Suzette A. Kock, sra. Ichelle Simon, sr. Atan Lee Sr., sr. Tyson Lopez, sr. Oscar Bislip, sr. Curt Croeze y sr. Andres Werleman.
E grupo di trabou lo haci un recomendacion dentro di tres luna na Prome Minister Mike Eman riba realisacion di un Centro di Bario pa Santa Cruz. E grupo di trabou lo entre otro haci un inventarisacion di e iniciativanan existente cu tin un meta igual, un inventarisacion di interesadonan den ehecucion di un centro asina; un indicacion di gastonan di un centro asina basa riba un dibuho di e funcionnan y su mobilario.
Minister President Mike Eman a splica cu door di ekipa espacionan publico ta contribui na stimula participacion di ciudadano y tambe comunitarismo. E MFA di Santa Cruz lo duna un contribucion grandi na miho servicio na Santa Cruz. Ta keda toch hopi actividad cu ta forma mas parti di e funcion di un Centro di Bario. Prome Minister a splica cu den esaki tambe di hopi clubnan na Santa Cruz cu tambe ta yena parti di e bashi aki. E estudio lo por indica cu toch mester di un facilidad adicional pa un Centro di Bario of cu e por bira parti di un compleho mas amplio y grandi den combinacion cu un club existente.
Durante bishita den bario Minister President Mike Eman y e team Bo Bario a scucha e deseo pa un Centro di Bario pa Santa Cruz. Tambe e ekipo di Prome Minister Mike Eman encabesa pa Ditto Acosta a haya e peticion aki for di e bario di Santa Cruz.
E grupo di trabou dentro di tres luna despues di e fecha di su instalacion lo presenta su estudio na Minister President. Tambe nan lo presenta mensualmente un reportahe di e avancenan di e proceso na Minister President.
