Parlamentario Endy Croes a reacciona riba un conferencia di Prensa di Benny Sevinger di AVP siman pasa unda Benny Sevinger den un serie di engaño kier bruha tera treciendo confusion alrespecto noticianan incorecto.

Benny Sevinger sinonimo di un  cleptomano farsante ta keda  uza e strategia di manipula pueblo, esta e strategia di Mike Eman y AVP pa asina trece informacionnan incorecto dilanti. Despues cu Benny a sali riba su cabay di difamacion, mesora parlamentario Endy Croes a pidi na parlamento di Aruba datonan corecto. Ta asina cu tur minister momento cu nan mester biaha sea priva of pa trabao nan mester meld esaki na Parlamento di Aruba unda esakinan ta wordo documenta. Pues na parlamento ta existi file di biahenan di tur minister.

Politica barata di Benny

Awe sinembargo parlamentario Endy Croes ta reacciona riba Benny Sevinger y lo corigi su ponencianan fofo fuera di contexto. Benny Sevinger conoci tambe como un cleptomano farsante cu a facilita un grupo di amigonan terenonan como patrimonio di e pais aki cual a wordo bendi pa sumanan miyonario, awe kier hunga politica barata. Manera parlamentario Croes a splica na varios ocasion cu e lo reacciona riba tur e mentiranan y manipulacionnan di AVP. Di acuerdo cu informacionnan veredicto cu a ricibi na parlamento di Aruba minister presidente Evelyn Wever Croes a haci un total di 10 biahe di trabao durante aña 2018 y a permanece un total di 26 dia pafo di Aruba cual ta bira un averahe di 2.6 dia pa cada biahe.

Biahenan di minister president

A haci 1 biahe pa Hulanda pa un encuentro cu Rey Willem Alexander y alabes reuni cu Stef Blok riba e situacion di Venezuela y a reuni cu Raymond Knops  riba e protocol. A efectua 2 biahe pa Washington: uno a reuni cu IMF riba e desaster cu Mike, Benny y AVP a laga atras y e di dos a reuni cu UNHCR.  Alabes a realisa 2 biahe pa New York, uno pa reuni cu Nacionnan Uni y e di dos tabata pa reuni cu UNICEF riba temanan di vital importancia. A realisa 2 biahe pa Corsou, uno pa un cumbre cu prome ministernan hunto cu minister Blok y e di dos tabata pa e reapertura di frontera di Venezuela y reunion cu Marina Real. Tambe minister presidente a biaha pa Costa Rica riba peticion di Hulanda pa representa Reino pa cu e cambio di presidente y alabes a probecha reuni riba e tema di Arubig. Prome minister a bay 1 dia Bonaire pa cu e Dia Nacional di Bonaire representando Aruba y finalmente a bay Sint Maarten pa firma un acuerdo pa un fondo di 30 miyon Euro y alabes un cumbre cu prome ministernan.

Mentira y manipulacion

Ora conta e total di biahenan di trabao nos ta yega na un total di 10 biahe y NO 16 manera Benny Langevingers a publica den prensa y ora conta e dianan di trabao cu prome minister tabata afor a  resulta di ta 26 y NO 90 manera Benny a divulga y manipula. Keda pendiente pasobra Benny a pone nos bay busca di dje y di Mike Eman y pronto lo bin cu un reporte di nan pa pueblo por compara. Di acuerdo cu informacion pre eliminario Mike Eman a biaha 25 bes den un aña esta na 2016 y a permanece 140 dia for di Aruba. Pues e diferencia den responsabilidad ta un diferencia manera entre shelo y tera. Pues Benny prepara bo pa defende esun di bo. Keda pendiente. Croes ta termina mandando un mensahe tambe pa Ministerio Publico pa nan acelera y haci nan trabao pasobra nan tin e file y tur documentonan di Benny Sevinger y su gang con nan a horta e pais aki y ta imposibel cu nan ta cana liber treciendo ainda mal informacion den pueblo.