Minister President a contesta preguntanan di Parlamentario Miguel Mansur: “Parlamentarionan mester ta cauteloso y usa informacion corecto”

Parlamentario Miguel Mansur a haci 16 pregunta na Minister di Enseñansa Rudy Lampe y Minister Preident Evelyn Wever-Croes. Mayoria di e preguntanan tabatin di haci cu enseñansa. Dos di e preguntanan tabata relaciona cu e cartera di Minister President. Minister President a contesta e preguntanan e siman aki, segun un comunicado di prensa.

Covid

Parlamentario Mansur a expresa su preocupacion cu e casonan di Covid cu ta aumentando y kier a sa ki medida di precaucion a tuma pa cu alumnonan. Riba esaki Minister President a splica cu dia 12 di augustus ultimo Crisis Team a dicidi cu scolnan no por habri dia 19 di augustus manera tawata premira, sino a hala e fecha pa 1 di september.

Esaki pa proteccion di nos muchanan, specialmente esnan bao 12 aña cu no por vacuna. Dia 1 di september scol lo cuminsa.

Refugiado

Parlamentario Mansur a sigi cu e ponencia “Teniendo cuenta cu landspakket ta inclui regularisa indocumentadonan”. Minister President a mustra cu ningun caminda den e Landspakket e palabracion aki a wordo haci. Pues e ponencia ta basa riba mentira.

Segun Prome Minister un parlamentario mester ta cauteloso y usa informacion corecto na momento di haci su trabao. Mas aleu, e Parlamentario a pidi Gobierno pa informa Parlamento cuanto e cantidad di indocumentado ta actualmente y di esaki por suministra Parlamento un tabel reflehando cuanto di e indocumentadonan aki ta adulto y menornan, cuanto ta homber y cuanto ta muhe.

Minister President a splica e Parlamentario cu e hecho cu e personanan aki ta indocumenta, ta pone cu nan no ta registra. Aruba conscientemente a scoge pa no registra esnan indocumenta, pasobra cu e registro, ta bin derecho. Derechonan cu Aruba na e momentonan aki no por cumpli cu ne.

Sinembargo Prome Minister a sigura e Parlamentario cu Aruba ta cumpli cu palabracionnan internacional y tratadonan, entre otro e tratado di refugiado. Gobierno di Aruba ta traha hunto cu UNHCR y IOM, organisacionnan internacional, pa asina por garantisa cada persona un forma digno di biba. Sinembargo e informacion cu e Parlamentario ta pidi, no ta disponible.

Por nota cu Prome Minister ta ricibiendo hopi pregunta di Parlamentarionan ultimadamente y ta contestando nan dentro di un periodo relativamente cortico, segun e comunicado ta finalisa.