Minister Plenipotenciario na Washington drs. Andy Lee a compaña Prome Minister mr. Mike Eman durante su bishitanan na diferente instancia, institucion, scolnan y tambe embahador di Reino Hulandes mr. Henne Schuwer. E bishitanan aki tur a bay bon lagando atras un bon impresion di pais Aruba, su vision y su metanan pa futuro. Temanan manera sostenibilidad, finanzas, naschoolse opvang y conservacion di naturalesa, tur a wordo atendi y a haya nan debido atencion.
Sr. Lee a splica cu otro siman nan ta bishita ‘State Departament’ pa un reunion dialuna. “Esaki ta mas bien un antesala di e ‘Energy Summit’ cu ta bay tuma luga otro siman riba dianan diamars y diahuebs. Dialuna Prome Minister Eman ta papia cu representante di energia Schleswig-Holstein pa Merca den e cumbre. E cumbre mes cu ta dirigi riba islanan Caribense y Centro Americano ta wordo atendi door di Ministernan Eman y de Meza. Interesante di e cumbre aki ta cu e ta wordo organisa door di Vice-Presidente Joe Biden.
Un otro punto importante ta cu Vice Presidente Biden a pidi pa tur isla haci algo riba tereno regional pa stimula e transicion riba energia renobabel. Den e cuadro ey Aruba a organisa diferente actividad, recientemente e ‘PPP Conference’ unda a duna informacion con financia proyectonan en general y en particular proyectonan di energia duradero. Un otro actividad cu Aruba a organisa ta e ‘Aruba Learning Event’ cu ta den liña di e ‘Energy Summit’ di 2015. Tin mas actividad cu Aruba a organisa riba e tereno aki cu ta interesante pa trece dilanti durante e cumbre pa duna un indicacion con Aruba ta trahando riba e tereno aki. Ta bon pa evalua cu kico mas Aruba por aporta na e agenda aki, cu ta enfoca riba e transicion pa energia berde y wak con nos por yuda otro paisnan den region.”
.jpg "Dowers: ”Dentro di 3 siman comision institui mester duna recomendacion”")
