Durante e bishita cortico di trabou di Minister Plenipotenciario Joselin Croes tawatin e honor di a logra haya un audiencia cu Gobernador Alfonso Boekhoudt.
Durante di e bishita a discuti topiconan manera Venezuela y politica na Merca, pero primordialmente Blue Economy y locual esaki ta significa pa Aruba. E topico di Blue Economy, cu ta nifica un economia sostenibel cu ta bin di bo lama, ta un topico cu mas y mas ta hayando oido, pasobra mundo ta realisa cu si nan no traha riba dje awor, aki 20 aña nos ta mucho laat.
Nos planeta ta consisti di 70% di lama. Lama ta contene 97% di tur awa riba mundo, pues 7.5 biyon di hende ta depende di e lama pa por come, pa por hala rosea y pa por drey nan economia. Den caso di Aruba nos ta depende pa 90% di nos turismo y nos lama. E ta sumamente importante pa nos como Arubiano realisa esaki y pa nos proteha nos lama.
Conforme e cifranan di WorldBank, pa 2050 tin mas plastic den lama cu lo tin pisca. E microplastic’nan den nos lama ta wordo comi door di pisca y esaki ta super peligroso pa nos mesun salud si nos come e microplastic’nan aki.
Aruba berdad ta bendiciona pa no ta den e area di horcan, pero mayoria isla den Caribe ta depende totalmente di tin coral y rifnan fuerte pa yuda nan proteha costanan. Pa Aruba esaki tambe ta importante, specialmente si nos kier keda un destinacion pa buceado.
Aruba ta riba e bon caminda cu e plastic ban policy, waste-to-energy facility, ceramento di Parkietenbos, build with nature, proteccion di coralnan, pero ta importante pa educa nos chikitinnan riba e importancia di nos lama.
Combersacionnan cu Gobernador tawata hopi ameno y Minister Plenipotenciario Joselin Croes lo keda den contact cu Gobernador riba e tema aki cu ta di hopi interes pa ambos.
