Minister Plenipotenciario Guillfred Besaril ta encabesa e delegacion di Reino na e Global Refugee Forum di UNHCR cu ta tumando luga e dianan aki na Ginebra.
E reunion plenario a cuminsa cu palabranan di bon bini door di e Minister pa Asuntonan Exterior di Suisa, Ignazio Cassis y e Halto Comisionado di Nacionnan Uni pa Refugiado Filippo Grandi.
Despues Secretario General di Nacionnan Uni António Guterres a duna un declaracion na e publico presente cu a consisti di hefenan di estado manera Presidente di Costa Rica Carlos Alavarado Quesada, Presidente di Turkia Recep Erdoğan, Prome Minister di Pakistan Imran Khan y Minister pa Asuntonan Exterior di Alemania Heiko Maas.
Durante e forum aki a papia tambe riba e situacion di refugiadonan Venezolano cu a yega e cantidad di 4.3 miyon hende y e cantidad aki ta crece tur dia. Esaki segun declaracionnan di Eduardo Stein, representante special di UNHCR-IOM pa refugiadonan y migrantenan Venezolano. E paisnan cu mas ta wordo afecta pa e situacion na Venezuela ta e paisnan Latino Americano y Caribe, specialmente en region Andino.
Aunke cu e paisnan aki ta enfrenta entre otro presion riba nan presupuesto y tensionnan social, e paisnan aki ta sigui haci tur cu ta posibel pa brinda proteccion y asistencia na e refugiadonan y purba na integra e refugiadonan den nan economia y proceso laboral.
Sinembargo segun Eduardo Stein,e situacion cu refugiado y migrantenan Venezolano a surpasa e capacidad di e region pa ricibi migrantenan Venezolano. Ta pa e motibo aki Stein a haci un yamada cu e situacion di refugiado y migrantenan Venezolano ta exigi un atencion ainda mas grandi di henter mundo.
Besaril ta atende e forum di UNHCR, debi cu Aruba a ratifica e tratado di refugiado di Nacionnan Uni. Y mirando cu Aruba tambe ta hay’e confronta cu e situacion na Venezuela, Besaril ta haci uzo di su presencia pa haci contactonan y hiba palabra cu funcionarionan importante na UNHCR cu por ta di ayudo pa Aruba enfrenta e situacion aki.
