(CuraçaoChronicle) – Minister Plenipotenciario di Corsou na Den Haag, Carls Manuel a contrata un abogado pa persuadi blogger Godfried Adem pa elimina mensahenan for di su pagina di Facebook y pa rectifica e contenido.
Den e post ofensor, Adem ta ripiti acusacionnan cu ta circulando riba rednan social cu Manuel ta hopi generoso den duna tareanan paga na ‘friends and family’ mientras e staff permanente di Curaçaohuis ta keda sin nad’i haci.
Mr. Sebastiaan van Wijk di DayOne Advocaten na Den Haag ta declara den un carta na e blogger cu e ta acusa su cliente di fraude y/of corupcion y pues ta haci daño na e ‘honor y bon nomber’ di Curaçaohuis y ‘e minister Plenipotenciario en particular’. Segun e abogado, esaki ta un ‘declaracion ilegal’ cu ‘ta afecta hopi negativamente e imagen di (e persona di) minister Plenipotenciario’.
Notablemente, e abogado no ta exigi pa elimina e mensahenan inmediatamente. Ta duna Adem cinco dia pa haci esaki. Si e no hacie, ‘e minister Plenipotenciario ta bay tin cu considera mas accion legal’.
Adem no ta impresiona pa e argumento di e abogado, mas ainda pasobra tin un diferencia grandi entre e mensahe cu el a post y e traduccion liber cu Van Wijk ta duna.
No ta conoci si Manuel tambe a laga su abogado manda carta na otronan cu a papia di dje di un manera similar. Tampoco ta cla si Curaçaohuis ta paga pa DayOne Advocaten, cual nan tarifa pa ora ta 350 euro, of si Manuel ta paga esaki riba su mes.
