Minister Plenipotenciario, Guillfred Besaril, a presencia den Ridderzaal diamars cu a pasa e recepcion pa tuma despedida di presidente di Eerste Kamer, Ankie Broekers-Knol. Na mesun momento a tuma tambe despedida di tur e miembronan di Eerste Kamer, cu lo no regresa mas na momento cu e Eerste Kamer nobo keda instala otro siman, dia 11 di juni.
Besaril, den nomber di gobierno di Aruba, a gradici Broekers-Knol pa su dedicacion como presidente di Eerste Kamer, pa fortifica e relacionnan den Reino Hulandes, en particular den contactonan interparlamentario. Como muestra di gratitud, Besaril a entrega un regalo na Broekers-Knol y a desea su persona tur clase di exito den futuro.
Por cierto, awe a keda anuncia cu Ankie Broekers-Knol a keda nombra como Secretario di Estado pa Asilo y Migracion. E funcion aki a bira liber despues cu Mark Harbers a retira como Secretario di Estado.
