“Cu e accion tuma door di Gobierno di Aruba, unda a mustra compresion tanto pa e punta di bista di Conseho di Reino como di Staten di Aruba, a conduci cu awe den reunion di Conseho di Reino, Aruba a haya e tempo y trankilidad necesario pa yega na un solucion unda tur partido por haya otro.” Esaki ta declaracion di Minister Plenipotenciario, Guillfred Besaril na final di e reunion di Conseho di Reino.

Den un comunicado di prensa, e mandatario a bisa cu e tin comprension pa e punto di bista di Conseho di Reino. Besaril: “Durante e periodo di 2012 te cu 2017 a firma protocol y a haci palabracionnan entre Hulanda y Aruba, pero cu e Gobierno di e tempo ey no tabata cumpli cu esakinan. Gobierno di Prome Minister Wever-Croes ta bisa loke e ta bay haci y ta haci loke e ta bisa. Pa e motibo aki, Conseho di Reino ta mira e seriedad y tin e confiansa cu por yega na un solucion hunto cu Aruba.”

Segun e comunicado, Besaril ta hopi satisfecho con e reunion a bay. “Aruba a haya espacio pa yega na un solucion y no tabata tin motibo pa duna Aruba un aanwijzing. Nos a mustra awe madurez den nos relacion cu Hulanda y esaki a conta cu aprecio di banda di Conseho di Reino,’” Besaril a termina.

Potret ta cortesia di Cas di Aruba