Na ministerio di Agricultura di Hulanda a tuma luga recientemente clausura pa e “Denktank Voedselzekerheid Caribisch Nederland” den presencia di minister di Agricultura, Naturalesa y Calidad di Alimentacion di Hulanda Carola Schouten. Tambe presente tabata minister plenipotenciario di Curaçao Anthony Begina, minister plenipotenciario di St. Maarten Jorien Wuiten y minister plenipotenciario di Aruba Guillfred Besaril.
E proyecto aki ta di e ministerio di Agricultura di Hulanda den cooperacion cu Fundacion WeConnect. Un grupo di 20 studiantenan y profesionalnan di tur e seis islanan Hulandes den Caribe pa e ultimo lunanan a haci investigacionnan na e islanan Boneiro, Saba y St. Eustatius. Nan a purba pa busca un contesta riba con pa promove e calidad di alimentacion, stimula agricultura y con pa acoge awa di yobe. Durante e encuentro tres di nan a tene un presentacion unda banda di e hecho di e clima y scarsedad di awa, tambe a bin dilanti cu e sector primario no tin un imagen mucho positivo bou e di poblacion y cu via di enseñansa lo mester por crea mas conscientisacion riba e materia aki.
Minister plenipotenciario di Aruba Guillfred Besaril na e ocasion aki a delibera riba e vision di gobierno di Aruba pa cu e sector primario. ´Aruba ta consciente pa stimula e sector primario pa medio di desaroyonan innovativo. Nos mester busca conocemento cerca institutonan manera Universidad di Wageningen, pa mira unda por bin cu solucionnan cu ta factibel pa Aruba. E clima di Aruba ta trece cu ne un reto grandi pa agricultura, pero cu aplicacionnan innovativo mester por logra un desaroyo positivo den e sector aki.
Aruba tin 120 mil habitante, pero na mesun momento Aruba ta ricibi mas cu 2 miyon turista pa aña di cual mas cu 1 miyon ta keda Aruba por lo menos un siman. Asina ta cu tin un mercado pa plantacion di fruta y berdura na Aruba cu por ta interesante pa inversionistanan,´ asina e mandatario a bisa.
Sr. Besaril a remarca tambe cu lo ta bon si e islanan por sondea maneranan di cooperacion. ´Bo por pensa como ehempel cu na Aruba ta planta tomati, na Curaçao ta planta concomber y na Boneiro ta planta lechuga. Con cu bay bin mester por yega na un punto unda cu door di plantacion ta reduci e importacion di fruta y berdura y asina crea cu e islanan ta menos dependiente di paisnan den exterior.´
Na final minister Carola Schouten a haci entrega di un certificadonan na tur esunnan cu a forma parti di Denktank aki. E mandatario Hulandes – cu september proximo lo bishita Boneiro, Saba y St. Eustatius – a bisa di ta contento cu e puntonan cu e Denktank a trece padilanti y a stimula nan pa sigui bin cu iniciativanan positivo pa cu e sector primario na e islanan den Caribe.
