Comision di Asuntonan di Reino di Tweede Kamer a tene riba dia 29 di mei un asina yama “rondetafelgesprek” riba e tema di e “geschillenregeling” pa Reino Hulandes.
Minister Plenipotenciario di Curaçao Anthony Begina, minister plenipotenciario di St. Maarten Jorien Wuiten y minister plenipotenciario di Aruba Guillfred Besaril a hiba palabra unda nan por a trece dilanti e punto di bista di nan pais riba e tema aki. Sr. Besaril a entrega den nomber di gobierno di Aruba un posicion paper cu ta hiba e titulo “Het belang van een onafhankelijk geschillenbeslechting”.
Minister Besaril den su declaracion na e parlamentarionan a ilustra e situacion den Reino Hulandes cu un ehempel di e situacion den Union Europeo, na unda ta respeta e opinion y punto di bista di e paisnan chikito, manera Dinamarca, Luxumburgo y Hulanda. Esaki tambe mester ta posibel den Reino Hulandes, segun argumentacion di sr. Besaril.
Tur tres mandatario ta di opinion cu e “geschillenregeling” lo mester bini na vigor pronto. Pero si cu e mester ta un “geschillenregeling” bon hinca den otro y segun e deseonan di e paisnan Caribense di Reino Hulandes. Esaki lo mester bira un punto importante durante e reunionnan di IPKO final di juni proximo.
E parlamentarionan a haya ocasion pa haci un pregunta na e tres ministernan. Despues di un schorsing chikito tabata na turno algun experto riba structura estatal, manera prof Ernst Hirsch Ballin, prof. Gert Oostindie y prof. Arjan van Rijn pa comparti nan opinion riba e “geschillenregeling” cu e miembronan di e comision di Asuntonan di Reino di Tweede Kamer.
