DEN HAAG – Recientemente minister plenipotenciario Guillfred Besaril a honra tres baluarte di 35 aña di existencia di Arubahuis. Aña pasa e mandatario a entrega un plakkaat na baluartenan cu 35 aña pasa tabata testigo di e apertura di e prome representacion di Aruba na Hulanda.
Sinembargo na november no tabata posibel pa reconoce tur hende na e momento ey y e convencion tabata pa na dado momento haci entrega di un plakkaat tambe a esunnan cu no por tabata presente e dia ey.
Recientemente minister plenipotenciario Besaril tabata tin e oportunidad pa a haci entrega di un plakkaat conmemorativo na Edwin Illidge, Mildred de Kort, viuda di Efraim de Kort (dfm) y Philomena Boekhoudt-Fingal, ruman muhe di Henry Fingal.
E mandatario a bisa di ta orguyoso pa rindi honor na esunnan cu tabata pionero pa representacion di Aruba na Hulanda. ‘Aña pasa nos a celebra e 35 aña di Arubahuis hunto cu e empleadonan y tambe aki a Aruba cu entrega di plakkaatnan di reconocimento na tur esunnan of nan famia cu tabata testigo di e hecho historico aki pa Aruba. Awe ta toca turno na bosonan pa boso contribucion of di boso famia den esaki. Awor cu nos a para keto na e fecha cu Arubahuis a keda funda y tambe cu desde awor Arubahuis tin su dia cu ta e prome diabierna di april, a yega e ora pa nos documenta e historia di Arubahuis. Mi a papia esaki cu DCA aki na Aruba pa mira con lihe nos por cuminsa cu e proyecto aki, mirando cu hopi di esunnan cu conoce e historia ya caba a alcansa un edad avansa,’ asina minister plenipotenciario Guillfred Besaril a bisa.
Despues di su discurso minister plenipotenciario Besaril a haci entrega di e plakkaat na Mildred de Kort, Fhilomena Boekhoudt-Fingal y Edwin Illidge. Nan tur tres a gradici minister plenipotenciario Besaril inmensamente pa cu e reconocimento aki y cu e aprecio grandi pa e loke e personanan aki a haci pa Aruba tin su representacion na Hulanda.
