Minister Plenipotenciario na Washington, Joselin Croes durante su bishita cortico na Aruba, a dedica tempo na algun topico sumamente importante pa Aruba entre otro: combatimento di polucion, energia alternativa, proteccion di nos lama y medio ambiente, construccion sostenibel y prevencion contra desasternan natural.
‘Blue Economy’ ta un topico hopi importante pa Aruba. Esaki ta e economia sustenibel cu ta sali for di bo lama cu ta piscamento, turismo, energia alternativo man den man cu proteccion di e lama, coral y bida marino.
Riba e topiconan aki, Croes a reuni cu e ekipo di Minister di Infrastructura y Medio Ambiente, Santa Rosa, TNO y Directie Natuur en Milieu pa scucha kico nan ta haciendo riba e terenonan aki pa mira unda e por crea oportunidadnan pa Aruba.
Ministerio di Infrastructura y Medio Ambiente
E ekipo di Minister di Infrastructura y Medio Ambiente a duna Croes un presentacion riba e proyectonan andando pa Aruba na unda por pidi yudansa, colaboracion y of financiamento na Merca. E proyectonan mas grandi ta e ceramento di e dump na Parkietenbos, traha un landfill nobo cu un incinerator y bin cu un waste to energy facility. Tambe e ekipo a presenta e ROPV nobo, cu lo trece cune transparencia riba cual ta e terenonan protegi y unda si y no por construi, tambe ta inclui e ‘build with nature policy’ cu ta proteha nos recursonan natural.
Na Croes nan a pidi ayudo pa cu experticio pa cu proteccion y restauracion di e coralnan, ya cu na Merca tin hopi organisacion trahando riba e ramo aki. Tambe Croes a duna un splicacion amplio riba ‘Blue Economy’ y fondonan disponibel pa esaki. Aki a keda palabra cu Minister Otmar Oduber lo biaha pa Washington DC na october pa e IMF/WB Annual Meeting pa asina haci un peticion oficial na Worldbank pa un ‘Blue Bond’ of un ‘Debt Conversion’, manera Seychelles a caba di haya.
Tambe a papia pa sondea e mercado internacional pa un otro material sostenibel cu no ta asfalt pa traha caminda. Croes a splica e ekipo cu World Bank a traha un rapport yama ‘Marine Pollution in the Caribbean: not a minute to waste’. Den e rapport aki nan ta indica cu si mundo sigui den mesun rumbo, cu pa 2050 tin mas plastic den lama cu pisca y cu principalmente e islanan den Caribe cu ta biba di lama y nan recursonan natural ta limita lo wordo afecta.
Aruba por ta orguyoso cu su plan di prohibicion di plastic. E rapport aki ta inclui un plan cu ta consisti di 12 punto di locual Aruba ya ta cumpli cu 7 di nan. Pa esaki Croes a felicita e ekipo, pasobra Aruba ta hopi mas leu cu tur otro isla. World Bank kier yuda Aruba yega na cumplimento di tur 12 punto, basta Aruba presenta un plan factibel y realisabel. E ekipo di Minister di Infrastructura lo traha un rapport basa riba e 12 puntonan aki pa entrega na World Bank pa yuda cu financiamento di e resto di accionnan cu falta.
