Minister di Asuntonan Interior y Relacionnan di Reino Plasterk a ofrece ayudo na Aruba den nomber di Gabinete Hulandes. Esaki pa loke ta sosten den combatimento di e consecuencianan di e mal tempo cu a asota Aruba den weekend. Dialuna den dia el a haci un yamada telefonico na Prome Minister Eman di Aruba pa brinda e ayudo aki.
Prome Minister Mike Eman a bis’e di ta agradecido pa e ayudo ofreci pa tanto Marina Real como RST (Recherche SamenwerkingsTeam) den weekend. A pesar cu e consecuencianan di e tempestad ta hopi, e ayudo ofreci te ainda no tabata necesario. Plasterk a bisa cu e oferta ta keda intacto y cu si mester lo yuda mas tanto posibel. Plasterk: “Mi a spanta di e imagennan cu e mal tempo a ocasiona. Afortunadamente no tabatin victimanan mortal, pero e daño material ta considerabel y algo asina tin un impacto grandi riba e habitantenan di e isla. Si Hulanda por yuda nos ta haci esaki cu mucho gusto.”
