Minister Michelle Hooyboer-Winklaar di Enseñansa y Famia a informa Bisdom di Willemstad riba e situacion den Stichting Middelbaar Onderwijs Aruba (SMOA) y Colegio Arubano, y a pidi entre otro e retiro di presidente Bart Kool.
Esaki e ta informa den un relato di prensa. Motibo ta, segun e minister, cu e comision di mayor (OCCA) di Colegio Arubano a bati alarma riba e decision di e rector interino y SMOA pa cu retiro masal di docentenan y diferente otro incidente pa cu e personal di e scol.
Mescos cu OCCA e mandatario ta indica den su carta na Bisdom di ta hopi preocupa pa e continuidad na Colegio Arubano y pa e interes general di studiante y docentenan di dicho scol. Siman pasa e noticia a sali cu presidente Kool di SMOA a tuma su retiro.
Minister Hooyboer-Winklaar ta indica den su carta pa Bisdom cu ‘e situacion actual ta e resultado directo di e ultimo cambionan di statuto di SMOA cu ta contra ley y tambe door di e maneho autoritario y solista di e presidente di e hunta di supervision Bart Kool’. Ministerio di Enseñansa riba conseho di departamento di asuntonan huridico di gobierno, ‘na mas cu un ocasion a informa SMOA cu a cambionan di statuto ta contra ley y cu si esakinan no wordo ahusta bek cu lo por tin consecuencia grandi pa cu e relacionnan di autoridad y responsabilidad interno y externo’.
Relacion dificil cu SMOA
Den e carta na Bidsom e minister a expresa tambe cu e relacion y comunicacion cu SMOA y particularmente cu sr. Kool e ultimo añanan aki como ‘sumamente dificil y casi imposibel’. E minister ta haci referencia akinan na tur e incidentenan di e ultimo añanan entre gobierno y e fundacion cu a conduci na casonan den corte entama door di SMOA di cual tur a sali negativo pa e directiva di scol. Como esun mas recien ta menciona e debate rond di e nombramento di e candidato pa rector nobo di Colegio Arubano unda cu e fundacion, cual ta e directiva di Colegio Arubano, ‘a ignora tur ley y regla vigente y ta opta pa bolbe manda gobierno corte sin ningun base’.
Perde confiansa
Minister Hooyboer-Winklaar ta bisa cu esaki ta ‘hopi lamentabel y ta indica cu tur esaki tabata tin un impacto sumamente negativo riba ambos personal y studiantenan di e scol.’ Den e carta na Bisdom e ta indica di a perde confiansa completo den e presidente di e hunta di supervision di SMOA, kende a wordo nombra door di Bisdom den pasado. E mandatario ta pidi pa retiro di inmediato di sr. Kool mirando e falta di confiansa como tambe a base di e hecho cu sr. Kool a pasa su termino stipula pa e statutonan como miembro di SMOA.
