Despues di un periodo di alrededor di 4 pa 5 luna cu a habri un proceso pa nombra un director nobo pa departamento di asuntonan social, awor por informa nos comunidad cu e proceso aki ta keda culmina.
Despues di un trayectorio largo cu a habri un vacatura habri pa tur esnan cu ta interesa den e posicion aki, a ricibi un total di 19 candidato cu a mustra interes den e posicion. Despues di a ricibi solicitud di e candidatonan, a bay over na evalua y haci un seleccion pa bay asina na un segundo fase caminda un comision di DRH y ministerio di asuntonan social a hiba un entrevista cu e personanan aki di cual a resulta den 6 candidato.
Di e 6 candidatonan aki cu e comision a presenta, finalmente a keda 2 persona potencial di cual lo ta nombrando un di e persona nan aki cu ta cumpli cu tur rekisito necesario pa hiba e carga di director di Departamento di Asuntonan Social.
Na dado momento Minister Paul Croes mes a hiba un entrevista cu e personanan aki pa asina ta sigur cu tin e miho escogencia posibel pa guia e departamento aki. Asina, pa fin di e siman aki e buskeda pa un director nobo lo culmina y e departamento di asuntonan social lo conoce un cabesante nobo cu cual meta y tarea primordial ta pa hisa, motiva, stimula y regla diferente aspecto, tanto di trahadonan como di servicionan.
Pa finalisa, Minister di Asuntonan Social a duna di conoce, cu su persona como esun encarga cu e cartera, lo presenta e persona aki na conseho di minister y asina haya aprobacion pa por formalisa e nombramento di un director nobo pa Departamento di Asuntonan Social.
