Minister Paul Croes: Minister di Comercio di Venezuela a confirma importancia di Citgo pa ambos pais

– Durante un encuentro cu e Minister di Poder Popular pa Comercio Exterior y Inversion Internacional di Republica Bolivariano di Venezuela, Sr. Jesus German Faria Tortosa a sostene cu Minister di Labor, drs. Paul Croes y Minister di Asuntonan Economico, Ing. Mike de Meza, e mandatario Venezolano a mustra riba e importancia di e refineria pa ambos pais.

For di e relacion comercial petrolero aki, e dos paisnan lo mester sigui traha pa amplia e relacion bilateral. E nacionnan ta liga geograficamente, historicamente, comercialmente, culturalmente y politicamente na otro.

Durante un encuentro na Oficina di Gobierno na Oranjestad, e titularnan di Labor y Energia a duna Minister Faria Tortosa un splicacion amplio riba e vision cu tin pa nos pais y inversionnan importante cu a logra mantene e nivel di desaroyo cu Aruba tin actualmente.

A splica cu Gabinete Mike Eman a scoge un modelo economico cu ta enfoca riba e reparticion di e bienestar y desaroyo na cada ciudadano. Asina a concentra den mehora barionan rond di nos isla cu ingreso di nos pais. A enfoca riba apoyo na e poder di compra di nos ciudadanonan y cu danki na e reapertura di e refineria na Aruba, esaki lo crece ainda mas.

Di su banda, e mandatario Venezolano a mustra cu e reapertura di e refineria ta importante no solamente pa Aruba, pero tambe pa su propio pais cu ta actualmente den un necesidad pa divisa. Faria Tortosa a ofrece tur su apoyo pa estrecha e lasonan entre e paisnan bisiña. Tur esunnan envolvi a cataloga e encuentro aki como uno hopi positivo.