Minister di Asuntonan Social, Maneho di Hubentud y Labor, Sr. Paul Croes a presenta su prioridadnan y plannan pa 2016-2017. Na inicio di cada aña ta logico cu gobierno ta presenta su plannan pa comunidad mustrando asina e direccion y vision cu e pais ta tuma. Tambe e direccion cu cada minister ta tuma den nan maneho pa cu hubentud y e aspectonan social. Tambe ta trahando riba un profiel desea pa un director nobo pa departamento di Asuntonan Social.
Minister Croes a presenta diferente punto con e aña aki e lo ta manehando e prioridadnan pa 2016-2017. Algun di e prioridadnan aki tambe ta continuacion di diferente proyecto, maneho cu a inicia dos aña anterior. Asina aki ta continua y fortifica pa e añanan dilanti. Aña 2015 a cera cu algun noticia grato, cu algun grupo meta den e sociedad, segun minister a indica. Naturalmente como minister di Asuntonan Social, encarga pa e gruponan mas vulnerabel, social mas vulnerabel, financieramente mas vulnerabel. Y cu e anuncio di aumento di salario minimo entrante 1 di februari 2016 cu 2.5% y e reduccion di e prijs di coriente cu 10%. Esaki ta e parti maneho social di gabinete Mike Eman II.
Enfoca riba tur aspecto
E maneho social lo keda enfoca riba tur aspectonan social den sociedad di Aruba. Pa cuminsa e aña aki un figura importante den henter e asunto aki ta un director pa e departamento di Asuntonan Social, e mandatario a indica. Desde siman pasa nan a cuminsa cu e proceso di profiel desea pa un director nobo di departamento Asuntonan Social pa 2016 y añanan en adelante. Sra. Lenny Geervliet a fungi como directora di Asuntonan Social pa 4 aña, pero aña pasa na december el a yega na e edad di pension. Aunke cu a ofrece un contracto pa e continua como directora di e departamento pa un aña mas pa asina gobierno y e departamento por yega na un traspaso pa un director nobo, pero esaki no a sosode ya cu Sra. Geervliet tin otro plannan.
“E lo keda cerca si di e maneho social,” e mandatario a indica. “Nos a compronde pa medio di minister Alex Schwengle, cu Sra. Geervliet lo ta apoyando nos den e aspecto di nos grandinan cu ta un tereno social importante. Mi peticion na su persona na e momento ey tabata ya cu bo ta bay ta cerca di e social veld, por fabor laga nos fortifica e lasonan cu e departamento social pa asina nos por tin un maneho coherente, maneho integral riba e aspecto aki,” minister a bisa.
Director interino pa Asuntonan Social
E proceso a start pa nombra un director nobo pa departamento social. Den curso di e siman aki, sea awe of mañan diaranson, e profiel desea lo wordo saca den prensa, lo ta e anuncio di kico ta rekeri pa ta un director di departamento di Asuntonan Social. “Tin cierto rekisitonan cu ta mara na dje. Bo mester tin cierto experticio, cierto experencia den e materia social, pero oficialmente esaki lo wordo saca e siman aki,” el a indica. “Mientrastanto nos por anuncia cu e departamento no ta sin guia. Tin un director interino adhunto nombra na e momentonan aki cu ta zorg pa diferente proceso cu ta andando.”
E director interino aki ta zorg entre otro pa e onderstand, entre otro aspecto di subsidio, entre otro e abogado liber, entre otro diferente aspectonan aki. Diferente procesonan cu lo mester keda canalisa y continua pa locual ta trata e trabounan di departamento di Asuntonan Social.
E director interino ta encarga cu tur e trabounan y hunto cu esaki a forma un comision cu Asuntonan Social, departamento di Recurso Humano y tambe personanan di ministerio di minister Croes, kendenan lo ta envolvi den esaki pa crea un proceso mas transparente posibel pa asina yega na un director nobo pa departamento di Asuntonan Social.
