Minister di Salubridad Publico, Dr. Alex Schwengle ta considera hopi importante cu e veld comprometi cu cuido di salud, tambe e parti financiero y e parti di maneho mester keda sinta hunto y dialoga cu otro a base di respet.
“Mi sa cu tin biaha nos lo tin desacuerdo leu leu, pero ta importante si pa hiba un maneho di pais y no di partidonan…”, asina e mandatario a declara na Bon Dia Aruba.
Cambio y maneho
El anuncia na e matutino aki cu e aña cu ta bin tin un par di decision fuerte cu lo wordo tuma. El a splica cu “fuerte” den sentido cu mester trece algun cambio den e maneho di AZV, y e organo aki kier e cambionan aki tambe. E cambio aki tin di haber cu trece mas disciplina internamente den AZV mes, pero tambe pafo.
El a laga sa cu ultimo añanan nan atencion a bay fuertemente pa e maneho di AZV mes y el a bay fuerte pa e banda di esunnan cu ta duna e cuido. Pero e ta haya cu di otro banda pueblo mester ta honesto tambe. “Esun cu mester duna di su banda ta esun e consumidornan”, el a bisa. E ta reconoce cu definitivamente nos pueblo tin hopi derecho pa un cuido optimal di salud, pero ta importante pa ban papia di obligacionnan tambe.
Minister Schwengle a afirma cu nos pueblo tambe tin su obligacion pa bin cu un cambio riba nan estilo di bida no saludabel. “Pueblo no por kere cu si bo ta un persona, bo ta come na bo smaak, bo ta pisa 300 kilo, bo ta huma sigaria y bebe alcohol na gusto, anto ora cu cos ta bay malo, e no ta bo culpa, e ta gobierno su culpa of tal persona su culpa”, asina e mandatario a bisa.
E ta considera importante pa pueblo por bay siña cu e tin su obligacionnan y e mester siña respeta su mesun bida y su mesun curpa. “Dios a duna bo un cos bunita, bo mester cuid’e, y aprecia y no abusa”.
Conscientisacion y respet
Den henter asunto aki e ta considera como minister di Salud, cu Gobierno su rol ta pa yuda guia pueblo y yuda educa pueblo. Riba e tereno aki e mandatario a anuncia cu nan kier bin cu un plataforma di educacion y informacion di pueblo unda tur e partnernan ta aden pa e aña cu ta bin tur luna nan ta bay Sali dilanti conhuntamente cada bes cu un topico pa ehempel diabetes, dengue, etc…
E campaña di conscientisacion aki ta permiti pa informa pueblo di e mesun manera ya cu “na momento cu nan ta cuminsa papia un lenguahe diferente nos ta bruha pueblo. Nos mester tin pueblo bon informa”.
E ta considera cu gobierno ta haciendo di su banda pa educa pueblo, pero pueblo mester ta habri pa educacion por drenta.
E ta haya cu ora cu ta wordo papia di cuido di salud su color no ta di niun di e colornan politico, ya cu e ta considera cu e color di cuido di salud ta e bandera di Aruba e tin. El a haya cu e ta un compromiso di tur esnan comprometi cu e tarea aki, y cu tur partner mester realisa esaki.
E ta admiti cu e ta un minister berdaderamente, y logicamente e tin un posicion di liderazgo, y e ta purba di haci’e mas miho cu e por. P’esey e ta exigi tur instancia of persona di e veld di salud pa mantene un dialogo directo y sincero cun’e.
“Mi ta un minister berdad y supuestamente mi tin un posicion di liderazgo. Mi ta purba haci’e mas miho cu mi por. Y p’esey mes ta importante pa papia cu mi y no tras mi lomba”, el a declara durante un entrevista cu Bon Dia Aruba.
El a bisa cu e ta habri ta tur hende cu lo desea trece cualkier critica bon of malo, ya cu critica ta bon y e ta habri pe. El a reitera cu e critica aki mester ta constructivo y no insultante, pasobra unabes cu e ta sinti cu un persona ta insulta su persona su oido ta dal cera.
E mandatario a indica cu tur instancia riba e tereno di salud mester ta comprometi cu esaki. Gobierno mester cumpli cu su rol di maneho bon, AZV tin cu hiba un bon maneho financiero y un bon control, Inspeccion di Salud mester bin pa controla e calidad, pero pueblo no mester ta pasivo y tira tur culpa pa gobierno. E ta haya cu e mentalidad aki mester stop. “Mi sa cu esey ta un sistema di socialista puro cu a wordo doctrina añanan largo”, el a bisa. E ta haya cu nos mester tin un curason social berdad, pero tin biaha bo mester ta realistico tambe.
