ORANJESTAD – Un biaha mas e dump di Parkietenbos tabata na candela siman pasa for di oranan di atardi te cu oranan di anochi. Ta asina cu aña pasa gobierno a yega na un punto rasonabel cu Parkietenbos y a cera esaki dia prome di juli 2018. Bon Dia Aruba a bay tira un bista na e sitio pa asina wak kico e situacion actual ta.

Ayera minister di Medio Ambiente Otmar Oduber a splica durante e conferencia di presa cu ainda tin hende cu ta subi tereno di dump y ta cende candela, e mandatario a bisa cu tanten cu no tin control completo riba e area ta dificil pa stop hende di subi riba e tereno di dump y ocasiona candela. E mandatario a bisa tambe cu e ta contento cu durante e ultimo lunanan e candela a disminui compara cu antes, ora cu candela tabata wordo ocasiona mas biaha pa via di taira y otro tipo di sushi.

Minister Oduber a expresa disminui di kimamento si sushi cu pa motibo cu tin cu menos hende subiendo riba dump awendia, tambe el a comenta cu tin 80% di e sushi cu no ta bay dump mas, y esaki ta procesa den e environmentals (Sushi Compacta) na Sero Teishi, e ta bisa cu na e area ey tin menos trafico y menos chens pa cende candela.

Tambe el a bisa cu tin hende ta bay dump pa deposita grofvuil, matanan y otro tipo di sushi cu ta wordo deposita, te ora cu yega na e proceso final di estado publico di RFP cu ainda ta andando

E mandatario a bisa cu tin tres RFP (Request For Proposal) cu ta andando actualmente pa loke ta trata e parti di incinerator, nan ta den e fase di e cantidad y nomber di e companianan cu por participa pa conoci, nan ta negociando, haciendo preguntanan, studionan y mester entrega proposicionnan na luna di mei venidero y cuminsa cu un proceso di evaluacion pa mas o menos un aña, pa despues lo evalua loke e companianan ta presenta. Despues di e proceso aki minister lo otorga e contracto di e incinerator cu lo ta funcionando.

Tambe e mandatario a duna di conoce un otro RFP a wordo cera e siman pasa y otro lo cera awe, un ta remedia Parkietenbos pa elimina e area pa no tin candela mas unabes cu e proceso lo tuma luga. E otro RFP ta trata di un dump nobo cu nan lo yama ‘Sanitary Landfill’ cu no lo bay deposita sushinan cu no por ser kima, manera azeta of tipo di materialnan peligroso cu no ta bay den incinerator, pero lo haci esaki den un forma responsabel.

Minister Oduber a splica cu e proceso total lo dura entre un aña y mey pa dos aña, e pa prome parti lo bira un cambio fisico, full e proceso di e RFP lo mester termina na mita di aña aki.

Di otro banda, minister a expresa cu Serlimar na Pos Chikito ta cla caba y na luna di april venidero, nan tin prepara e upside di e center cu tambe ta funcionando.

Di otro banda , Bon Dia Aruba tambe a yama Serlimar pa haya informacion tocante e tipo di sushi cu ta bayendo riba e dump y na unda ta bay algun desperdicio special por ehempel e desperdicio di hospital manera hangua, materialnan medico, entre otro, pero nos no haya ningun reaccion di e departamento.

Ora e ekipo di Bon Dia Aruba a yega na e luga, a ricibi informacion cu no mag saca potret di e luga sin permiso di algun funcionario, pero e funcionario no tabata na e momentonan ey.