Durante conferencia di prensa cu a sosode e siman aki Minister Otmar Oduber a pone enfasis riba e maneho nobo DIP, esaki considerando e diferente insinuacionnan haci recientemente, cu como e mandatario encarga, e no ta pone ‘akkoord’ riba ningun peticion cu yega na Ministerio pa tereno.
Segun e comunicado cu Bon Dia Aruba a ricibi ta indica,como Minister ora esaki sosode lo duna un ‘voor advies’ conforme e maneho cu ta publica riba e website di DIP den un forma transparente. Di e forma aki e ciudadano sa nan derecho y obligacionnan, pasobra ora cu un persona bin na remark’e pa tereno e mester por cumpli cu e condicionnan.
E forma di traha di ex Minister Sevinger na unda cu e ciudadano mester a sinta, roga y yora na su oficina no ta tuma luga den e Gabinete Wever-Croes. Awe sin discriminacion tur persona cu entrega peticion na DIP ta yega na turno a base di First In First Out (FIFO) a traves di e maneho transparente cu ta ehecutando.
Esaki a bin ta haciendo, atendiendo cu peticionnan di 1994 pa cual por bisa cu e aña aki ta yega 2010! (fin di luna di augustus lo ta atendiendo peticionnan di 2008-2009). Tin dos screening ta tuma luga, ta controla na Censo pa wak si durante di e añanan a casa y tin un cas cu un hende entre otro, considerando e añanan cu a pasa. E otro screening ta tuma luga na Kadaster, pa tambe mira si ya a adkiri un otro cas. Si esaki ta e caso, e persona su peticion ta wordo saca afo pues solamente esunnan cu pasa e screening ta ricibi carta di DIP. Pa di e forma aki bin na remark’e pa prueba cu tin financiamento necesario pa ricibi un ‘optie’ riba un tereno. Esaki a e procedura cu ta conta pa cada ciudadano, Minister Oduber a enfatisa.
