Minister Otmar Oduber tocante dump di Parkietenbos: ‘E problema ta implica henter comunidad, mester a cera dump hopi aña pasa’

Durante un conferencia di prensa cu minister di Infrastructura, Medio Ambiente y Desaroyo Teritorial, Otmar Oduber a duna ayera, el a declara tocante algun preocupacion di esunnan cu ta biba den area di Parkietenbos, Simeon Antonio y henter area rond di e dump y Ser’i Tijshi.

El a bisa cu pa hopi ocasion el a splica cu e problema aki ta algo cu ta implica henter comunidad. Mester a cera e dump hopi aña pasa, pa hopi motibo y pa hopi circunstancia sumamente peligroso cu tin critico den area aki. Aña pasa Gobierno a tuma e decision di un fase transitorio pa cuminsa pone balesnan pa locual nan a cera un contracto pa dera esakinan na Ser’i Tijshi.

Di mesun manera, el a insisti cu esaki no ta e miho solucion a largo plaso pa e situacion. Tin problemanan cu ta confronta tur dia den area na Parkietenbos, cu candela cu ta cende y ta wordo cendi. Esaki ta un situacion cu ta inhumano pa e bario di Parkietenbos y e area rond di esaki.

Tambe, Oduber a informa cu ayera a yega expertonan internacional na Aruba, pa yuda mira con por limita y mitiga mas cu ta posibel e problemanan serio cu tin den e area aki.

“Mester busca solucion a largo plaso”, Oduber a declara.

Na e momento aki, el a comenta cu ta wardando pa e reunion den Parlamento pa por continua y atende cu un ley, cu na momento cu e pasa lo nifica cu solamente ta pone compania Serlimar para riba su propio pia – conforme cu un ley cu ya caba ta existi for di aña 2005, caminda cu no tin un discusion den e comunidad di Aruba pa loke ta trata e participacion of contribucion di e compania.

Den e mesun linea, Oduber a señala cu a sinta cu sindicato y stakeholder, pero e discusion ta riba un aspecto di un compania priva cu ta sinti cu su derechonan den cierto momento ta wordo limita pa futuro.

Den e ley aki, lo brinda e unico posibilidad pa Gobierno tin y crea e fondonan, cu no tin cu traspasa mas den un Dienstverleningsovereenkomst (DVO) na Serlimar, pa motibo cu e ora ey ta bay tin tres fuente di entrada, cu ta di comunidad, comercio y turismo, cu ta brinda pa Gobierno e ora ey e posibilidad pa por inverti den un sanitary landfill, pa di e forma ey por cera tanto Ser’i Tijshi como dump di Parkietenbos y percura pa atende pa cu e desperdicio i e sushi den un fase transitorio, te cu yega na e discusion mas grandi cu mester tuma luga den Parlamento.