Ayera atardi, durante un conferencia di prensa cu Minister di Infrastructura, Desaroyo Teritorial y Medio Ambiente, Otmar Oduber a tene cu medionan local, el a splica e situacion tocante un memo cu e compania Metacorp a manda pa su empleadonan, pa via relaciona cu un posibel ceramento di tres di su companianan, principalmente Ecogas cu Ecotech.

Oduber a comenta cu el a haya e carta como un sorpresa, pa motibo cu den ultimo aña e compania tabatin varios reunion hunto cu su persona. Tambe el a expresa cu nan tabatin un caso den Corte hunto cu gobierno anterior pa haya terenonan ubica na avenida Nelson Oduber y cu pa motibo di e gobierno aki, a base di cierto combersacion, a detene e caso den Corte y nan a haya e terenonan pa construi e cinema.

Di mesun manera, Oduber a bisa cu na cuminsamento di aña 2018 tambe nan a reuni pa loke ta trata e compania Ecogas, cu e tempo ey tabata paketa e bales y manera ta conoci tabata deposita eseynan den un forma ilegal na Moko; cu a para e proceso aki e tempo ey, pa motibo cu locual tabata tumando luga no ta corecto.

Tocante esaki, Oduber a señala cu el a yega na un acuerdo cu Metacorp, caminda cu Serlimar ta paga awendia un suma di casi 3.7 pa 4 miyon florin pa aña pa por hinca e sushi ey den e bales y cu despues mester dera esakinan na Sero Teishi. Esey no tabata e miho solucion, segun Oduber mes a comenta, pero tabata menos malo pa loke ta trata e higiena, salubridad di e pais y situacion cu tabatin na Parkietenbos.

Oduber a expresa cu mediante e carta cu a manda, e compania ta mal informa e trahadonan ‘como si fuera cu e ley di Serlimar lo por tin como consecuencia cu Ecogas y Ecotech lo mester bay cera nan porta’.

Di loke ta trata e ley di Serlimar, esey ta un ley cu no tin nada nobo den dje, segun Oduber a manifesta. A entrega e ley aki siman pasa na Parlamento di Aruba, pa motibo cu e compania aki tin mas cu un derecho di existencia como un compania cu a lanta na aña 2005 y esey ta pa haci un tarea di gobierno y entre otro ta pa recoge y maneha e sushi genera na nos pais.

El a bisa cu, na cierto momento, a crea e pensamento cu e ley tin cu bay Parlamento pa crea un monopolio cerca Serlimar, y esey lo por nifica e final di e dos empresa en cuestion; pero den e ley den su articulo 2.4 ta bisa cu no ta pa bira un monopolio manera cu ta na Hulanda, Corsou y Boneiro unda si tin un compania so cu ta recoge y maneha sushi.

Oduber a splica cu esey ta nifica cu e ley cu tin caba na e momentonan aki, gobierno ta defini y a duna e tarea na Serlimar pa pone un startplaats na Aruba y esey awendia ta conoci Parkietenbos, como startplaats pa mas di 60 añanan. Ora Oduber a pone Sero Teishi, desde cu gobierno tin e contract cu Ecogas, pa por pone e bales na Sero Teishi, tur otro caminda ta ilegal, asina el a manifesta.

Tambe a resalta cu Serlimar, den un futuro, ta e unico compania cu por kima den un insinerado e sushi di e pais, cual ningun compania na Aruba tin te awendia.

“No tin ningun motibo pa un tipo di carta asina, pa crea panico cerca e trahadonan”, Oduber a sigura. Asina mes el a bisa cu Ecotech tin mas di 90% di e mercado comercial y den henter e ley en cuestion no tin niun elemento cu ta stroba nan pa sigui haci nan trabou.