Ayera mainta Minister di Infrastructura, Desaroyo Teritorial y Medio Ambiente, Otmar Oduber a comenta cu desde februari di aña pasa Gobierno a anuncia un maneho nobo pa loke ta trata otorgamento di tereno tanto residencial como comercial.
El a splica cu den caso aki nan a inicia un proceso den cual a haci un proyecto pa por recupera tur e retraso cu tabatin cu hende cu ta aplica pa un pida tereno pa por traha nan cas. Manera minister mes a expresa ‘nos a limpia e database di DIP pa prome biaha’.
El a informa cu nan a mira ken ta interesa pa haya un tereno, ken por haya un tereno y ken a haya caba un tereno, pa nan por tin e database actualisa.
Di mesun manera, minister a señala cu awe, den e prome grupo cu lo wordo anuncia cu ta conta pa tur esunnan prome y esunnan cu ta sigui, el a bisa cu ta cuminsa cuatro proyecto importante cu Gobierno lo implementa. Por ehempel un tereno di desaroyo na Sero Colorado pa 150 residencia y ta duna oportunidad pa tur esunnan cu ta inscribi na DIP pa forma parti di dje.
Tambe a comenta cu na Caya Jose Geerman na San Nicolas, lo cuminsa cu e prome proyecto pa cual a cera un acuerdo via grupo di arkitecto y ingenieronan di Aruba, na unda tin un espacio destina pa construi entre 90 pa 100 cas bay ariba, cu ta crea e posibilidad pa biba den edificionan cu tur facilidad.
Ademas, Oduber a bisa cu na Eagle tambe tin otro proyecto cu tin un destaho publico, pa cual lo otorga tambe pa construi entre 170 pa 200 cas, manera edificio di 5 piso y asina tambe na Pos Chikito Burubundo, cu den e momentonan aki ta den e fase final y posiblemente lo firma un Letter of Commitment pa cuminsa otro aña un proyecto di mas o menos 800 pa 900 cas cu lo wordo construi tanto horizontal como vertical, poniendo enfasis pa bay halto.
Preservacion di medio ambiente a conduci cu a introduci e maneho di Building with Nature, caminda cu ta conserva y preserva naturalesa, a traves di aanlegvergunning cu ta wordo formalisa den ROP, pero cu ya caba ta wordo implementa na e momentonan aki
