Minister encarga cu Transporte Otmar Oduber a trece informacion dilanti di e situacion actual di Aruparking, cual e siman aki hopi a wordo bisa den medionan di comunicacion.
“Nos a tuma nota di expresionnan di miembronan di oposicion di Parlamento riba Aruparking cual Mi ta lamenta. Si mira locual cu e encuesta di Camara di Comercio a produci, unda cu a manda email na tur tienda y un cantidad rond di 60 a contesta esaki, cual ta minoria. Cierto momento ta puntra si e encuesta aki ta representativo berdad den centro di ciudad. Of si por interpreta cu e resto di tiendanan si ta sinti e efecto positivo di parkeermeter. Ta mira tambe cu e propio empleadonan ta confirma cu parkeer ta mas facil aworaki pero claro un grupo tin disgusto con cu aworaki nan mester paga pa parkeer y antes e no tabata asina. Tambe mayoria di e tiendanan ta bisa cu tin mehoracion den parkeer y accesibilidad den centro di ciudad.”
Manera menciona den nos articulo anterior, Sr. Oduber a bisa cu Aruparking tambe ta terminando cu un encuesta cu nan a haci riba usuarionan. Pa esaki el a bisa cu e ta kere cu e combinacion di e dos encuestanan lo por determina e maneho di Aruparking pa den futuro. Na un forma hopi cla ta mira cu el a dura 6 luna pa hendenan adapta y por mira den e periodo tambe cu continuamente mas y mas hende a haci uzo di e sistema di Aruparking cual ta positivo. E mandatario a sigui splica cu claro tin espacio pa mehoracion cual lo haci tambe, prome cu cuminsa cu e area di hotel. Mientrastanto kier haya e resultado di e encuesta pa mira kico e clientenan mes ta sintiendo.
Sr. oduber a bisa cu e siman aki a papia cu negoshinan cu a forma parti di e ‘focus group’ y e asociacion di BID di caya grandi. Gobierno ta haciendo hopi den e aspecto di mercadeo, entre otro ponemento di borchi di señal, pa guia e turistanan pa bay den caya. Sinembargo aworaki e tiendanan tambe mester tin maneranan pa atrae e hendenan for di riba e tram pa bay den nan negoshi, Sr. Oduber a termina bisando riba e tema aki.
Free parking
Otro tema cu el a comenta riba dje ta e situacion di e carta di 75 mil florin cu Aruparking a dirigi na gobierno, cobrando pa e 9 dianan di free parking na luna di december.
El a splica cu na december, pa stimula caya grandi gobierno a haci compromiso pa duna e 9 dianan aki liber. Esaki liber pa e usuarionan pero Aruparking ta keda un NV cu mester opera manera cualkier otro negoshi. Gobierno a absorba e gastonan pa e dia ey, y ora mira e entrada di Aruparking pa aña, 9 dianan piek aki den december nan no por perde di gana pasobra nan tambe tin nan gastonan. “Tur entrada di Aruparking ta bay 100% pa Arubus, esey kiermen cu automaticamente cu e placa ey lo mester bin na subsidio despues di gobierno na Arubus. Locual a haci, ta a crea un incentivo pa caya grandi, pa yuda cu benta pa tur e aña di proyecto cu nan a pasa aden etc. Pero cu riba su mes, si e invoice no a bin awo, toch e lo a bin despues como parti di e subsidio, el a conclui.
