ORANJESTAD – Durante conferencia di prensa Minister di Desaroyo Teritoiral, Infrastructura y Medio Ambiente Otmar Oduber a informa tocante di e proceso di introduccion di Ruimtelijk Ontwikkelingsplan (ROP) y Ruimtelijk Ontwikkelingsplan met voorschriften (ROPv) cu ta andando.

Pa loke ta e ROP nobo tin 137 zienswijze cu a drenta na Directie Infrastructuur en Planning (DIP) cu na e momentonan aki ta wordo inventarisa pa percura pa atende cu esakinan den ROP nobo cu ta wordo implementa na final di juni venidero.

Manera ta conoci, ley ta permiti pa gobierno por a extende e ROP bieu un biaha, pa cual gobierno a extende esaki cu dos luna pa duna oportunidad/ tempo pa e raad nobo, Raad voor de Ruimtelijk Ontwikkeling (RRO) por revisa esaki. Miembronan di RRO ta refleha e balansa di desaroyo economico infrastructural y cuido di nos medio ambiente, pues a envolve esunnan cu directamente ta mantene nan mes cu cuido di nos medio ambiente.

Pa 14 di juni venidero conforme ley, e RRO mester entrega nan conseho na gobierno. Hunto cu e trabounan haci na e momentonan aki di inventarisacion di zienswijze na DIP, lo percura cu pa final di juni e ley nobo wordo introduci cu tur e adaptacionnan.

Importante ta, cu esaki ta un ROP cu a wordo carga na un forma hopi habri y transparente, transmiti y comunica cu comunidad, minister Oduber a enfatisa. E aspecto cu e RRO tin e oportunidad aworaki pa duna nan conseho, no a tuma luga na 2009 mesun elabora manera e ta tumando luga na e momentonan aki. Na 2009 tabatin menos cu 30 zienswijze, aworaki tin mas cu 130, esaki ta pasobra a traha duro riba e aspecto di conscientisacion pa comunidad ta informa di nan derecho di inzage y pa por entrega zienswijze. Despues cu ricibi e conseho di e RRO 14 di juni, lo añadi e conseho aki na e trabounan cu ta wordo haci pa inventarisacion di e zienswijze nan y pa fin di  juni ta spera cu por anuncia e ROP nobo na comunidad di Aruba.

Minister Oduber a splica cu paralel cu ta importante pa menciona cu ta bezig cu e ‘voorschriften’ pues e ROPv cu ta haci e implementacion di e Landsverordening ruimtelijke ontwikkeling (LRO) uno completo. Unda cu no solamente tin e responsabilidadnan pa e funcionario publico determina aden, sino cu e derecho y obligacion di e comunidad tambe ta wordo hancra a traves di e maneho cu ta wordo treci dilanti y e ley cu mester bay parlamento, pa loke ta trata e voorschriften di ROP.

Ta spera cu na september e ley lo por ta na parlamento pa por cuminsa su debate publico cu lo mester termina e ora ey den e ley oficial  cu lo wordo publica. Den esaki importante ta cu a duna instruccion na e team trahando riba e ROPv hunto esunnan di RHO advies bureau di Hulanda, cu kier haci di San Nicolas un proyecto piloto caminda cu ta bay uza San Nicolas y e desaroyo cu kier crea den e area. Pa describi esaki den hopi mas detaye pa proteha mas cu ta posibel e aspecto cu a identifica e desaroyo di San Nicolas cu ne cual ta esun di cultura y herencia. Pues locual kier evita ta cu e desaroyo cu ta bay tin na Sero Colorado, lo crea e mesun consecuencianan cu tin na e momentonan aki na Palm Beach. Caminda cu na cierto momento a acomoda centro comercial y yen actividad den porta di hotel cual tabatin consecuencia negativo pa centro di ciudad.

Contrario na esaki, ROPv lo mester preserva y cuida e centro di ciudad na San Nicolas pa esaki keda e centro economico cu tin cu sostene e desaroyo di alohamento cu por wordo crea den e area di Sero Colorado. Minister Otmar a termina cu e splicacion aki, ilustrando locual cu por logra traves di ROPv.