Durante un conferencia di prensa cu Minister di Infrastructura, Medio Ambiente y Desaroyo Teritorial, Otmar Oduber a ofrece ayera na medionan local, el a splica e situacion cu comunidad ta sinti na e momentonan aki, relaciona cu construccion di rotondenan y distinto camindanan cu ta cera y ta causa hopi molestia cerca e chauffeurnan.

Tocante e malestar aki, el a manifesta cu gobierno tin un contract di Watty Vos Boulevard, cu manera el a bisa: ‘Nos no por ta nada orguyoso di dje’, pa motibo cu e caminda di Watty Vos Boulevard no a ser haci den e miho forma, y segun el a informa e ultimo lunanan ta bay bira mas dificil.

Oduber a informa cu gobierno a inverti casi mey miyon Florin pa trece campañanan di conscientisacion den corant, TV y radio, pa purba splica e cambio cu ta tuma luga riba e camindanan, y muy particularmente pa loke ta trata Watty Vos Boulevard, un proyecto cu a haya hopi critica.

Riba esaki, el a comenta cu no ta kere cu nan lo finalisa e proyecto conforme contract. A pesar di tur presion cu ta ricibiendo pa caba na augustus, minimo e lo bay dura dos luna mas, y lo percura pa keda cu un producto cu ta mas cerca posibel di e balor di placa cu nan a paga p’e den e contract en cuestion.

Tocante e camindanan cera, trafico cu ta dificil den ora specifico di dia, y e cantidad di rotondenan cu no ta totalmente cla y cu tin falta di asfalt, el a comenta cu mester habri caminda pa via di e presion cu nan a haya pa duna mas acceso posibel. Loke ta pasa ta cu e conexion entre full e ruta di Watty Vos Boulevard, cu tin cu sali for di aeropuerto y termina banda di Ling and Sons, no ta comunica cu otro.

Oduber a pidi pasenshi di comunidad di Aruba pa loke ta trata e finalisacion di e proyecto aki y e molestia cu ta ocasionando den trafico, cu den e proximo tres lunanan (maximo cuater luna) comunidad lo bay sinti un alivio, ora e proyecto finalisa.

“A pesar di contract malisimo aki cu a cera, den un par di luna mas nos ta bay ta orguyoso di tin un netwerk di caminda, y nos lo crea e trankilidad pa nos comunidad”, Oduber a expresa.

Asina mes, el a sigura cu gobierno no lo bay den mas gasto y pone debe pa pais Aruba pa proyectonan grandi, pero nan a inverti cu fondonan di presupuesto cu comunidad por sinti den tur caminda rond di Aruba; for di Westpunt te Punta Basora. A inverti miyones den infrastructura pa camindanan di asfalt cu antes tabata caretera di tera cu tabata ocasiona problemanan di salud.