Ayera mainta, durante un conferencia di prensa cu minister di Infrastructura, Medio Ambiente y Desaroyo Teritorial Otmar Oduber a ofrece pa e medionan local, a trece dilanti cu desde algun dia atras, Gobierno a tuma nota di declaracionnan di partido AVP – cu gobierno ta purba di crea algun circunstancia pa piscadonan – cu no ta cuadra den cuadro di Aruba Marine Park.

Oduber a expresa cu el a desmenti e informacion cu a sali den un conferencia di prensa cu e ex-Prome Minister Mike Eman a haci hunto cu algun piscado, caminda a mustra cu parke marino lo stop piscamento den pida baranca y el a contesta cu esey no ta berdad.

El a gradici Arthur Giel, Presidente di Fundacion Hadicurari, kende a aclaria e dolor cu e piscadonan tin y a manifesta cu e mesun ex-Minister Mike de Mesa a pasa e piscadonan na aña 2016 un ley cu a prohibi e pesca di un gran cantidad di especie cu no a wordo defini den ley. Manera Oduber a splica su persona hunto cu Minister Chris Romero y Minister Andin Bikker ta trahando aworaki pa coregi e ley.

Bon Dia Aruba a puntra Oduber su opinion tocante e situacion di desaroyo y problemanan cu piscadonan di Waf’i Rancho a duna di conoce dos luna pasa, ora nan a haci entrega di un carta di manifiesto. Oduber a bisa cu esey ta forma parti di e mentiranan di e partido opositor AVP, pa motibo cu segun e mes a sigura, el a reuni cu Clifford Rosa, Presidente di Stichting Rancho y algun piscadonan ora nan a bishita tur rancho den cuadro di Parke Marino.

Den plannan di Gobierno anterior, na momento cu edificio a wordo bendi y cu kier cambia henter e trafico den e area ey, y caminda cu lo blokia e entrada di piscadonan pa e area cu nan ta uza. Oduber a comenta cu el a splica nan cu esey no ta e hecho y cu lo wordo permiti. E area di e pier ta keda den uzo di piscadonan y e area pa nan por yega cerca pa nan por baha tur material cu mester bay den boto tambe mester keda accesibel.

Ta berdad, segun Oduber a manifesta, cu nan lo kier embeyece henter area aki, cambia y haci fluho di trafico pa uno mas eficiente, pero e proteccion di e area cu e piscadonan a uza y ta uza na e momentonan aki lo keda existi y no lo bin cambio riba esaki.

Tambe el a informa cu Gobierno ta bezig cu APA, pa motibo cu den pasado, den awanan di Barcadera y tambe na Playa, cierto momento APA tabata maneha e luga ey, cu aworaki Gobierno ta negociando cu APA pa por haya terenonan di desaroyo pa abou di loke ta trata Port City y e ora ey e awanan tambe ta bin bou maneho di e pais, pa haci posibel e acuerdo cu piscadonan pa loke ta trata e accesibilidad pa nan beach via Waf’i Chikito.