Preparacion ta den full swing pa pais Aruba drenta un era nobo pa locual ta trata procesamento di desperdicio medico, ‘sludge’ y desperdicio di awa preto.
Segun un comunicado di gobierno, ta importante pa informa na comunidad cu den dos pa tres siman tur cos lo ta cla, pa e insinerado mas chikito cu ta destina pa procesamento pa desperdicio medico aki na Aruba y sludge, cu ta desperdicio cu ta sali di awa preto cu ta produci aki na Aruba, como tambe bestianan morto y otro tipo di servicio. Antes, e kimamento tabata tuma luga den un open air burner y tur gas cu tabata sali tabata bay den aire, e gas creando contaminacion cu ta haci daño na e ser humano y medio ambiente.
Gobierno a bay un proceso di destaho cu a tuma luga, caminda a trece un insinerado cu por bay haci esaki na un forma hopi mas responsabel pa loke ta cuido di salud di hende y medio ambiente y esaki ta bayendo hopi bon, segun e comunicado.
E insinerado lo bira un ‘state of the art’ ora e drenta den operacion aki dos pa tres siman. E sistema nobo aki ta laga den pasado e forma antiguo di kima bestia y kima e tipo di productonan cu tabata trece gas hopi dañino den comunidad.
Ta spera cu comunidad di Aruba por ta testigo di esaki, pasobra ta un di e hopi pasonan cu ta tumando luga pa laga atras tur maneho di desperdicio di un forma iresponsabel cu tabata tuma luga den ultimo añanan y drenta den un era nobo. caminda na un forma responsabel ta maneha sushi y desperdicio aki na Aruba, segun e comunicado ta finalisa.
