Den un comunicado di prensa, Minister di Desaroyo Teritorial, Infrastructura y Medio Ambiente, Otmar Oduber, ta informa comunidad tocante culminacion di e proceso di RFP (Request for Proposal) pa haya un solucion pa maneho di desperdicio riba nos isla.
Esencial pa indica den esaki ta cu gobierno ta garantisa viabilidad di e Waste Energy Facility por medio di legislacion, segun e comunicado. E proceso di maneho di desperdicio na Aruba conoce un trayectoria largo, unda den transcurso di añanan a crea un ‘milieuverordening’ y awo ta implementa e ‘afvalstoffenverordening’. E leynan aki ta percura pa e forma cu ta trata cu desperdicio ta tuma luga den manera responsabel, teniendo bienestar general como punto di salida.
Relaciona cu esaki por indica cu Aruba, como parti di Reino Hulandes, tin e obligacion di mantene su mes na tratadonan internacional, manera esun di Basel, cu ta cardinal pa un maneho di desperdicio responsabel. E tratado di Basel ta regla entre otro exportacion y importacion di desperdicio.
Mediante e proceso legislativo aki, gobierno ta garantisa tur participante un proceso integro, transparente y duradero pa locual ta trata un ‘Waste to Energy Facility’ pa nos pais, segun e comunicado ta conclui.
