Minister Otmar Oduber ‘Otro acomodacionnan’lo keda inclui den maneho di turismo

Aruba ta bay bira un frontrunner den 2016 unda cu lo mester prepara pa e cambionan, adelanta na e cambionan y su consecuencianan. Esaki ta loke Minister Otmar Oduber a expresa pa loke ta cambio di maneho di nos turismo.

Na september aña pasa durante celebracion di Dia Internacional di Turismo, Minister Oduber a indica caba cu tin un fenomeno cu no por bira cara pe. Esey ta e fenomeno di “other accomodations’, es decir tur e otro lugarnan unda hendenan ta keda cu no ta hotel. Un di e plataformanan mas reconoci ta airbnb, pero tin tambe home away, flipkey y otro cantidad mas cu ta creciendo na un velocidad halto. E fenomeno aki ta creciendo na nivel mundial y Minister Oduber a bisa oficina di Turismo cu lo inclui e acomodacionnan aki den maneho y lo percura pa reuni cu nan proximamente. Di e forma aki lo por percura pa e nivel di calidad y exigencia por wordo poni delanta.

Den e proximo biahe di Minister Oduber pa Hulanda el lo sinta cu Gemeente di Amsterdam cu ta un di nan cu a hinca den ley con ta atende cu e otro tipo di acomodacionnan. E gemeente aki tambe a crea un sistema di categoriza e diferente acomodacionnan cu no ta hotel y esaki lo por yuda pa Aruba por encamina, hunto cu e decision di inclui e parti di ‘otro acomodacionnan’den e maneho pa por bira partner cu nan, pa por coop cu nan, percura pa nan tambe ta exitoso y cumpli cu un nivel minimo di exigencianan di calidad y compromiso di paga impuestonan manera e otro hotelnan tambe ta haci.

Minister Oduber a bisa tambe na september cu si hotelnan no subi e trein di competi cu e acomodacionnan aki, nan ta bay keda atras y por mira cu pa practicamente e ultimo 7 lunanan e grado di ocupacion ta cay. Esaki no ta cay pasobra turismo ta malo, pasobra turismo ta sigui crece y tambe den e placa cu turista ta laga atras den economia. Loke ta pasando ta cu hendenan ta scogiendo pa otro alternativa cu no ta hotelnan na Aruba.

E mandatario a bisa cu den e instruccion cu a bay pa Oficina di Turismo no solamente ta inclui e otro acomodacionnan, pero tambe lo bay reenforza e cooperacion cu tin pa sigura cu hotelnan no ta bay sigui wak e tipo di caidanan aki mas, pasobra Aruba ta diferente cu e otro mercadonan y destinacionnan den Caribe, nos ta depende pa casi 90% di turismo. Ta importante pa mantene esaki mirando cu hopi biaha e otro acomodacionnan, contrario na hotelnan, no tin mester di trahadornan. Pesey ta importante pa sigura ambos sector y dor di esey e decision di bay mas agresivo den mercadeo na Merca, sin laga afor cu hotelnan tambe mester tin un strategia pa nan sigui opera na e nivel cu a tuma lugar te awor. Otro acomodacionnan ta competencia pa hotelnan, pero e ta parti di un totalidad pa loke ta destinacion Aruba y hunto nan lo haci cu Aruba ta bay bira un frontrunner den 2016.