Ayera durante conferencia di prensa extra ordinario y hopi emocional, Prome Minister EvelynWever-Croes hunto cu ministernan di su gabinete, principalmente Minister Otmar Oduber a anuncia Oduber su retiro oficial di politica y di su posicion como Minister di Infrastructura, Medio Ambiente y Desaroyo Teritorial.
Den e conferencia, Minister Oduber a expresa cu despues di basta combersacion cu Minister Presidente, el a tuma e decision ‘strictamente personal’ cu tin di haber cu varios factor y lo termina su carera politico y su posicion como minister na luna di december.
“Mi famia naturalmente ta un di motibo principal, mi salud tambe ta un motibo, pero Otmar t’ey ainda”, Minister Oduber a comenta.
Di mesun manera, Minister Oduber a bisa cu tur trahado tin dos of tres luna pa traha ‘pre-aviso’ cu e ta tumando pa termina cu plannan cu tin y despues di esey oficialmente Drs Marisol Lopez-Tromp colega di su partido, lo bay asumi e funcion di Minister di Infrastructura, Medio Ambiente y Desaroyo Teritorial.
Tocante e luga den Parlamento, ta nifica cu esey lo bin cu cambio, Minister Oduber a splica cu e ta combersando cu dokter Dellanire Maduro y cu e lo bay fungi como Parlamentario reemplasante di Lopez-Tromp na december.
El a recorda cu 22 aña pasa, specificamente dia 12 di december el a bay pa su prome eleccion na aña 1997 y tempo ey como candidato y cu hubentud, el a bisa cu un persona no mester bira un dinosaurio den politica, “bo mester ta den politica mientras cu bo por contribui y mientras bo ta sinti cu bo tin un vision pa futuro”, el a señala.
“Partido POR a nace y ta keda marca den historia” Minister Oduber a sigura y asina mes el a recorda cu e lo bay keda activo cu pueblo y lo keda sostene su partido pa motibo el a bisa cu e ta kere cu el a bin den un momento historico pa percura pa un gobierno cu tabata t’ey no a contribui mas na e bienestar di e pais aki.
Oduber a dirigi algun palabra na Prome Minister Evelyn Wever-Croes y a afirma cu pais tin un Minister Presidente cu tin un curason caminda e pueblo kier pa e tin’e, maneho no tabata facil y e situacion di e pais ta dificil, pero e gobierno aki tambe tin decisionnan pa tuma y a expresa cu nan kier wak e pais aki cu un futuro, un pais fuerte y cu miho bienestar pa loke ta su hendenan cu biba riba dje.
