Pa tiendanan y museonan por prospera mester cliente tanto local como turista. Y aki ta unda cu minister Otmar Oduber a bisa : E “galiña di oro” aki a wordo encontra, y esey ta e hotel “Secret Baby Beach Aruba” un hotel di 5 strea All Inclusive cu den su prome fase lo construi 600 camber y den e di dos fase 300 camber mas.
Segun e comunicado cu Bon Dia Aruba a ricibi, ta indica cu e hotel lo wordo construi den un area cu no ta “groen gebied” y cu ya pa decadanan a wordo asigna pa construccion di un hotel. Cu e desaroyo aki, e centro di San Nicolas lo bira e Shopping Center di e hotel, pues e hotel lo no inclui un Shopping Center den su facilidadnan. Gobierno lo bay construi un Boulevard cu ta conecta Downtown San Nicolas directamente cu e area hotelero na Sero Colorado, e ta bira un shortcut atractivo pa drenta y sali di e ciudad. Ademas di e hotel “Secret Baby Beach Aruba” tin dos otro grupo di inversionista local cu tambe ta trahando riba nan proyecto di dos boutique hotel di 40 camber.
Pa loke ta infrastructura y medio ambiente; Baby Beach lo bay wordo amplia pa acomoda un fluho mas grandi di turista na e playa sin cu e pueblo local ta ser perhudica di por uza e beach. Lo mantene e unico cueba bou di awa cu ta bou di e tereno, y e lo keda publico. E hotel grandi no lo bin riba e tunnelnan di fosfaat, es mas; e desaroyadornan di e hotel a compromete pa yuda conserva y promove e tunnelnan como un atraccion turistico di e prome industria di Aruba. E otro playanan lo wordo amplia y preserva mas tanto posibel den nan estado natural.
Pa 40 aña caba Gobiernonan di diferente asignatura a purba haya inversionistanan interesa pa construi un hotel grandi pa San Nicolas.
Awor porfin nos a haya un grupo cu ta interesa, cu tin e capital y e boluntad pa inverti na San Nicolas y pa ta e pionero y trecker di e desaroyo turistico, e galiña di oro cu nos tabata buscando pa pone e webonan di oro pa un futuro nobo pa San Nicolas!
Comments are closed.