Ayera minister Otmar Oduber tabatin un encuentro cu e ‘stuurgroep’ y empleadonan di DLV/Kadaster, pa asina trata e proceso di independisacion di e departamento. A tuma tempo pa splica na cada empleado e progreso y kico tur nan por spera. Mester bisa cu e encuentro a bay ameno, y awo ta sigui cu e progreso pa asina finalisa e proceso.

Falta di eficiencia
For di aña pasa a anuncia e intencion pa independisa departamentonan di gobierno y DLV ta uno sigur cu a bisa cu ta mira hopi posibilidad pa haci e cambio.

E ta un departamento cu actualmente ta costa gobierno hopi placa y tin hopi ineficiencia pa motibo cu gobierno no tin e fondo suficiente pa inverti pa haci e departamento funciona den forma mas productivo. E ta un departamento cu gobierno sigur ta mira e importancia pa e por brinda miho servicio na comunidad mirando cu hopi hende tin mester informacion continuo di DLV.

Despues di trabounan grandi haci pa e stuurgroep cu envolvimento di tur departamentonan concerni den dje, nan a termina cu nan conseho cual nan a presenta y cual a discuti riba dje. Adicionalmente, un ‘business plan’ tambe a keda formalisa. E plan social pa e trahadonan y e ley pa loke ta trata e posibilidad di crea un NV nobo caminda cu DLV/Kadaster lo resorta bou di dje tambe ta biniendo cla proximamente. ‘Despues cu Gobierno ricibi esaki y e bay Raad van Advies, e lo sigui e proceso pa Parlamento di Aruba pa por yega na establece e NV e aña aki’, minister Oduber a duna di conoce.

Minister Oduber a splica cu den forma continuo a percura pa empleadonan di e departamento ta bon informa pa cual a contesta diferente pregunta y a uza ehempel di departamentonan independisa manera: Aruba Tourism Authority (ATA) y ANSA. Cual minister Oduber mes den pasado a percura pa e proceso di independisacion tuma luga. Tambe a haci uzo di Serlimar como un ehempel actual y cu ta den e proceso aki, caminda cu empleadonan ta keda central pa logra e meta di eficiencia y mehoracion di servicio cu kier brinda na comunidad.

Por ultimo, a trata e aspecto di e asina yama ‘formatie plan’ cu durante e ultimo 10 añanan no a percura pa e wordo oficialisa. A pone esaki como condicion (sindicatonan y representante di e trahadonan den e reunion a pone esaki tambe como exigencia). Algo cu minister Oduber a mustra di ta para fuertemente pe. Pues despues di 10 aña por logra formalisa e posicion huridico como ambtenaar di tur e trahadonan di DLV y di eynan duna nan e oportunidad pa por drenta e NV nobo.