Minister Otmar Oduber a elabora riba e Decreto Ministerial cu a pasa encuanto otorgamento di tereno durante conferencia di prensa. Minister Oduber a informa medionan di prensa y comunidad en general riba e condicionnan cu tin den e decreto aki pa evita traspasonan di tereno na un tercer persona sin permiso di Minister di Infrastructura.
Segun Minister Oduber, pa añanan largo tawata tin cierto insuficiencia den ley di cual personanan cu a ricibi un tereno erfpacht di Gobierno pa traha cas of pa desaroya proyectonan comercial of economico tabata haci uzo di nan pa por a haci negoshi cu e tereno aki.
Segun e comunicado cu Bon Dia Aruba a ricibi ta indica cu den e Decreto Ministerial actual, Minister Otmar Oduber a splica, cu tin 3 punto specifico cu mester wordo tuma den consideracion. E prome punto ta e prohibicion di hypotheek riba terenonan sin aprobacion di e Minister concerni. Pa un persona por pone un hypotheek of seguro pa garantisa e erfpacht pa por wordo pasa na un tercer persona lo mester tin un aprobacion di Minister di Infrastructura.
E di dos punto den e Decreto Ministerial aki ta loke ta trata e aandelen di un rechtspersoon cu esaki tampoco no por wordo traspasa den un ‘economisch eigendom’ sin acuerdo di e Minister di Infrastructura. Esaki ta evita e traspasonan bou man cu tabata tumando luga pa añanan largo na unda tabata firma cartanan lateral via abogado pa loke ta traspaso di e aandelen cu despues unabes cu tin e hypotheek ta pas’e pa e doño nobo. Tampoco ta permiti pa endeuda aandelen den un compania cu tin terenonan publico cu ta erfpacht pa evita tambe e tipo di traspasonan ilegal cu tawata tumando luga.
E di tres punto ta cu no ta necesario pa haci e peticionnan aki directamente na Minister di Infrastructura sino tin cu manda tur peticion pa DIP caminda ta entrega e peticion si en caso kier purba haya e autorisacion pa por bende e propiedad of NV. DIP lo haci e investigacion necesario y lo duna conseho na e Minister di Infrastructura si ta duna aprobacion of no. Pa loke ta trata institutonan oficial cu ta controla door di Banco Central, ta wordo automaticamente exonera di e necesidad di autorisacion di e minister.
