Recientemente Minister Otmar Oduber a duna di conoce cu e ta contento cu señor Eduardo De Veer a reflexiona y realisa cu Gobierno tin un interes general pa sirbi
“Meta mester keda e ciere di dump parkietenbos y landfill temporal di Seri Teishi, mientras ta crea un sanitary landfill duradero conforme un maneho di desperdicio di sushi sostenibel”, asina e mandatario encarga cu Medio Ambiente a declara na su yegada di exterior den fin di siman. “Interesnan personal no ta e prioridad na e momentonan aki, y ta contento cu e director ehecutivo di Meta Corp tambe a compronde esaki awo”, e mandatario a sigui declara.
Segun e comunicado cu Bon Dia Aruba a ricibi ta indica cu minister Oduber a splica riba e reunion entre Serlimar y EcoGas siman pasa, unda a papia riba e contract vigente y con lo extende esaki despues di december awo y bao cua condicionnan nobo. E meta ta keda pa por traha hunto na un miho bienestar di e comunidad. “E campaña negativo y ofensivo di parti EcoGas contra Serlimar y mi persona ta keda pa loke e ta, pa mi semper e bienestar di Serlimar como empresa y su empleadonan, como tambe e bienestar general di esunnan cu ta biba den vecindario di Parkietenbos y Aruba en general ta keda e prioridad”, Minister Oduber a sigura.
E mandatario a mustra riba e hecho cu esey ta e meta cu e cambionan den e ley di Serlimar, o sea garantisa ambos meta. Na final di dia esey ta loke ta conta. No tin un gobierno individualmente cu por soluciona esaki su so, ta tuma henter un comunidad pa logra esaki y gobierno ta consciente di esaki y p’esey ta sigui cana e caminda di dialogo entre tur gremio y gruponan pa logra e meta aki proponi.
