E concepto di cambio di ley di “hotel vergunning verordening” ya caba ta na Parlamento, segun Minister di Turismo Otmar Oduber. Pa algun aña caba gobierno ta formulando e miho cambio di ley, e amienda, cu mester wordo haci pa otorgamento di permiso na hotelnan aki na Aruba, den cuadro di e fenomeno di All-inclusive.
Dia 12 di april e ley den su concepto y proposicion a yega Parlamento. Den e simannan cu ta bin e ley aki lo mester wordo trata y discuti cu Parlamento pa loke ta trata e cambio bastante “ingrijpen” cu lo bay tuma luga, segun Minister Oduber. Den e caso aki manera ta conoci ya caba ta un par di aña na momento cu Westin Hotel a wordo tuma over e tempo ey pa Riu, ya caba gobierno den su maneho a anuncia tabata preparando pa loke ta e cambio di ley aki caminda cu kier regula. Loke mester percura di crea un balansa den e mix cu gobierno kier crea den inventario di cambernan cu tin na Aruba.
Opera como time share
“Ora cu nos ta papia di e mix aki, nos ta papia naturalmente di un balansa cu ta trata di e cantidad di cambernan cu ta opera como time share. Cu ta wordo opera como European Plan (EP), naturalmente cu ta wordo opera tambe como All-inclusive,” e mandatario a indica. Na e momentonan aki Aruba tin mas o menos 32 porciento di su cantidad di cambernan cu ta wordo opera conforme e modulo di All-inclusive. Esaki por ta hotelnan cu ta100 porciento All-inclusive of hotelnan cu den cierto porcentahe, entre 10 cu 20 porciento, ta opera nan hotel cu e posibilidad di All-inclusive. Apesar cu nan ta sea un time share of un IP operations. “Nos sa tambe cu e dependencia di Aruba pa cual ta e discusion aki a inicia y cu Parlamento di Aruba unanimamente a duna un mocion na gobierno caminda cu a duna e tarea pa prepara e aspecto legislativo aki, pa nos por defende e interes general di pais Aruba,” Minister Oduber a bisa.
Depende hopi di turismo
Tur hende sa cu Aruba ta depende pa loke ta trata su entrada di GDP casi 88 porciento ariba e pilar economico. Gobierno ta mira cu esaki ta wordo treci dilanti continuamente tambe door di e diferente rating agency, pero tambe door di diferente instancia aki na Aruba manera Banco Central y otronan cu ta pone e interes y e bienestar di e economia di Aruba den un man cu ta depende hopi fuerte di turismo. Pero mas fuerte ainda segun den e caso aki e World Aruba Travel & Tourism, den e caso aki ta representa casi 91 porciento di forsa di e clase trahado di Aruba directamente y indirectamente, segun Minister Oduber.
Number 1 pa depende di turismo
Den un ultimo relato cu a sali recientemente, Aruba den 184 pais ta na e rango como e number 1 ariba e lista aki cu mas ta depende di turismo. Manera cu e discusionnan a inicia algun aña atras, segun e mandatario, mester a percura y segun e tarea tambe via e mocion di Parlamento, unda cu e 21 miembro di Parlamento a vota na fabor di e mocion pa prepara y zorg pa tin un ley cu ta regula e efecto, e impacto, di loke ta trata All-inclusive ariba comunidad. Gobierno sa cu den Caribe e averahe di cantidad di cambernan den cada destinacion ta rond di 72 porciento. Kiermen di cada 100 camber, 72 camber ta wordo opera como All-inclusive. “Nos sa tambe cu e ta un trendt cu ta crece y ta bay sigui crece den e proximo dies añanan,” Minister Oduber a indica.
Mas o menos 32% operacionnan All-inclusive
Recientemente na Cuba ta papiando di casi 50 mil camber adicional y nan lo ta All-inclusive riba e isla aki. Gobierno sa cu na Cancun, Jamaica, Republica Dominicana, continuamente tin un incremento substancial den operacionnan All-inclusive. Aruba tin mas o menos 32 porciento, cu ta menos cu e mita loke ta e averahe den Caribe. Gobierno ta considera esaki y den e ley tambe lo pone un cap di 40 porciento di e inventario cu nan lo desea cu por opera conforme un All-inclusive, sea cu esaki ta compone di hotelnan cu ta 100 porciento All-inclusive of un di dos cap ta wordo poni den e ley aki tambe, ta cu cada hotel ta opera como un EP tin e posibilidad, e flexibilidad cu e ta opera un maximo di 20 porciento como un All-inclusive y esaki ta pa Aruba keda competitivo den e region aki, na momentonan specificamente cu por atrae gruponan, convencionnan of congresonan aki na Aruba.
