Ayera partido politico Raiz a entrega un carta na parlamento riba ley referente Aruba Property Fund, unda ta tilda e minister encarga di busca mas influencia pa por bende propiedad di gobierno. Minister Otmar Oduber (POR) di su banda a reacciona bisando cu e carta ta ‘nonsense’, entre otro pasobra minister di infrastructura ya caba por bende propiedad di gobierno conforme Comptabiliteitsverordening.
Den e carta lider di partido Ursell Arends ta pidi presidente di parlamento pa duna mas informacion riba e preocupacionnan cu nan tin, cual segun nan ta pasobra e minister lo por haya influencia indebido den mercado di real estate por medio di e instituto aki, cual lo bira un compania di gobierno (NV). A pidi tambe e concepto di ley, e conseho y ki dia lo trata esaki den parlamento.
‘Minister ya caba por bende propiedad di gobierno sin bay parlamento’
Den un reaccion na Bon Dia, e minister a indica cu e carta aki ta ‘nonsense’. “Mentalidad hopi ta insinua cu ta pa ami tin e control siendo cu pa ley caba e minister di infra ta encarga cu edificionan di gobierno y por bende esakinan caba conforme ley existente. No mester cambia ley pa por haci esaki.”, e minister a conta e matutino aki. Segun e mandatario minister encarga cu infrastructura por bay bende edificionan di gobierno sin mester bay parlamento, conforme Comptabiliteitsverordening.
E minister a duna di conoce alabes cu e mes no ta buscando control pa su mes, mirando cu entrante 12 di december e lo retira. “Pro si ta laga un instituto fuerte pa gobiernonan di turno, manera cu a pasa cu ATA y ANSA y pronto Serlimar”, Oduber a declara.
Ademas di esaki, e mandatario a indica cu den un compania di gobierno NV, minister no ta manda, si no e hunta di supervision (Raad van Toezicht). Riba pregunta dicon a scoge pa bay cu e structura huridico di un NV, e minister a indica cu esaki ta pa basa riba e tarea cu nan lo bay eherce.
“Nan lo por fia placa pa drecha edificionan y traha edificionan pa gobierno, en bes di bay paga miyones na tercer partidonan , manera SOGA y Vastgoed AIB”, Oduber a sigui splica.
Bon Dia a tuma contacto cu e lider di partido Arends, pa puntra riba kico Raiz ta basa su mes pa loke ta e miedo cu minister lo haya un poder adicional, pero nos no a ricibi contesta na momento di publicacion. E ley riba cual e Aruba Property Fund ta basa a pasa Raad van Advies y lo ta bayendo pa tratamento den Parlamento siguientemente.
