Durante un conferencia cu a dura mas cu un ora, Minister di Infrastructura y Medio Ambiente, Otmar Oduber, a trata tres tema, pero esun cu el a duna basta atencion y cu a genera hopi pregunta for di prensa tabata Minister Oduber su reaccion riba declaracion di Parlamentario Daphne Lejuez tocante asina yama Ley di Serlimar.

Encuanto Parlamentario Lejuez su decision pa bira independiente, Minister Oduber ta haya cu ta un decision cu nan mester respeta di su persona pa haci esaki. Pero e ta haya cu den e proceso aki, parlamentario a papia hopi riba Ley di Serlimar, locual ta pone cu como gobierno y como minister encarga, mester duna su reaccion.

Presion y compania.
E prome punto cu e mandatario a reacciona tin di haci cu Parlamentario Lejuez a referi na un presion grandi cu a pone riba su persona. E mandatario no sa for di unda e presion aki a bini, pasobra e parlamentario mes no a menciona specificamente esaki.

E mandatario a referi cu den un mocion di Parlamento entrega dia 28 di augustus 2018, entre otro Parlamentario Lejuez a sostene e maneho di gobierno riba maneho di desperdicio y sushi, caminda 11 miembro a vota na fabor, entre nan Lejuez, y 8 a vota contra.

Den su reaccion e mandatario a cuestiona e echo cu siendo parlamentario Lejuez ta mustra como Directora di un compania, pero un compania cu ta brinda servicio na e unico compania priva di recoge sushi y maneha desperdicio cu a haci resistencia ‘feroz’ na e Ley di Serlimar.

E no sa si Parlamentario Lejuez a notifica Presidente di Parlamento cu e tin otro entrada, y si pone e organo legislativo na conocemento di e entrada of suma cu e ta ricibi of cuenta anual di su compania, segun ley ta stipula.

E ta cuestiona cu Parlamentario Lejuez tin dos aña den Parlamento y e tin un compania cu ta generando fondo. Un compania cu ta traha pa otro compania envolvi den e discusion aki, y e mandatario ta puntra su mes si nos ta papiando akinan di interes personal y no general.

“Nos por a mira un atake feroz di parti un compania, den 84 compania cu tabata haci servicio di recoge sushi y maneha desperdicio di sushi,” el a bisa.

E minister a agrega cu e ta un solo compania, cu por cierto, Lejuez mes a reconoce cu su compania ta traha pa nan y ta haya entrada for di nan. Te hasta di un forma habri e compania di Parlamentario Lejuez a traha propaganda contra e ley di Serlimar, el a bisa. “Si esaki no ta conflicto, kico ta conflicto?” el a puntra su mes.

Miembro di RvA.
Durante su declaracion e mandatario a bin cu un serie di slide di documentonan pa sostene su argumentonan, y el a priminti cu prensa lo haya tur e documentonan aki. Te hasta el a exhibi un potret unda ta mustra Eduardo de Veer di Meta Corp, compaña pa un miembro di Raad van Advies, Rik Timmer, durante un bishita cu supuestamente nan a realisa cerca Gobernador di Aruba, asina e mandatario a sigura.

El a cuestiona e echo cu un miembro di RvA por a participa den un reunion asina ‘poniendo presion riba e figura di Gobernador di Aruba.’ E ta puntra su mes si ta corecto si un miembro di RvA por actua asina. El a bisa cu ora bo lesa e rapport di RvA riba e Ley di Serlimar ‘casi bo ta kere cu ta un compania priva a skirbi e rapport aki’. E te hasta e ta puntra cual pechi Timmer ta bisti como miembro di RvA. Mirando cu el a bay cana na oficina di Gobernador compaña cu e doño di e compania mes cu ta contra e Ley di Serlimar.