Aunke minister Otmar Oduber(POR) a bin cu varios argumento riba e mudamento di parti di operacion di Serlimar for di San Nicolas pa ex edificio di DTI na Pos Chikito, lider di fraccion di AVP, Marlon Sneek ta considera esaki como un forma di sigui gasta placa di e gobierno aki. Esaki a pesar cu gobierno ta vocifera cu pais Aruba ta pasando den un crisis financiero.

A pesar cu e mandatario encuestion a argumenta cu e cambio aki lo haci Serlimar mas central y accesibel. Tambe cu esaki lo contribui pa un epoca nobo di asina yama economia circular. Ya e actividad aki den e edificio aki lo stimula e tendencia di recicla cu ta tumando luga rond tur parti di mundo, pa parlamentario Sneek esaki ta netamente un decision pa cumpli cu un tercer y no cu e pais aki. Esaki ta bay costa e pais 720 mil florin pa aña, segun e parlamentario di oposicion.

El a bisa cu tur e gobiernonan anterior a haci uzo di edificio pa keur auto, pero di ripiti e no ta sirbi y e no ta mas suficiente, segun e parlamentario. Tambe Serlimar tin añanan cu ta existi y nunca nan no tabatin mester di edificio y awor di repenti nan tin mester di dje.

E ta haya cu dia cu e mandatario aki a bin cu su plan total di maneho, niun momento e edificio aki no tabata aden. “Nos ta mira si ta un mortuorio mester buta aden, e lo pone e mortuorio basta pa cumpli cu e doñonan di edificio.”

El a recorda cu den un reunion den parlamento e mandatario a bin pa purba kibra e contract di e mudamento di servicio di keur auto cu a bay pa Barcadera, y e tabata kier pa esaki bin bek. Pero despues hues a faya contra, ya cu mester cumpli cu e contract. E ora e mandatario a extende e contracto sin tene nada den dje y te hasta inventa un actividad pa huur e luga.

E ta haya cu no ta necesario ya cu nos ta haciendo separacion di sushi caba. Ora e persona ta yega dump e mesun security ta indica e persona den cual baki nan por benta nan depende di e sorto di sushi. “E no ta nada nobo. E kier inventa algo pa bay huur un edificio”, e di. Tambe na dump mes tin full un edificio para cu a wordo traha tempo di ex minister Booshi Wever, cu niun hende ta uzando y cu nan por a wordo uza pa e proyecto cu e minister actual a bin cu ne na Pos chikito. “Pa kico bo tin cu paga 720 mil florin si bo ta bisa cu e pais aki ta den un crisis financiero.”

Minister no a cumpli cu ley
Parlamentario Sneek ta lamenta cu gobierno ta bisa cu no tin placa pa un MFA na San Nicolas cu ta un facilidad cu a mustra su beneficio y cu ta paga su mes cu e huurmento di e localidadnan cu tini. Mientras cu awor nos por mira cu nan ta bin cu un centro di reciclahe ‘pa dump’ sushi na Pos Chikito.

Parlamentario Sneek a laga sa cu e mandatario no a cumpli cu ley, ya cu un tipo di negoshi di separacion di sushi ta trece molester y bestia den e bario. Naturalmente e bario mester a wordo poni na haltura riba e actividad aki, pero esaki no a sosode. Tampoco no tabatin un destaho publico, sino cu unilateralmente a dicidi pa gana un suma di placa asina pa huur un edificio. Pa loke ta cumplimento di ley di compatibilidad mester reglamenta mas. Ya cu e ley aki ta indica cu e minister mag di cera un contract di 5 aña. “E no ta duna e suma cu e minister ta mara na dje.” E situacion aki ta demanda cu mester revisa ley aki.

El a tuma nota cu te hasta miembro di parlamento cu ta forma parti di e coalicion di gobierno tambe a reacciona riba e forma y falta di transparencia cu e proceso aki a bay. E ta spera cu ‘no ta djis un grito y cu di berdad nan ta para den nan sapato y para locual ta tumando luga.’

Na final parlamentario Sneek a declara na Bon Dia Aruba cu locual ta tumando luga no ta corecto. Niun momento minister por cuantifica e gasto aki, sigur no durante tratamento di presupuesto, ora cu el a haya e placa aki den su presupuesto pa bay gasta. Niun dia el a informa parlamento cu e lo bay huur edificio aki y cu e lo costa e cantidad di placa aki, segun e lider di fraccion di AVP.