ORANJESTAD – Minister di Asunto Interno y di Reino, Kajsa Ollongren y secretario di estado pa Asunto di Reino, Raymond Knops, a duna ayeratardi un rueda di prensa pa clausura nan bishita di un dia na Aruba.
Durante nan bishita nan a papia cu Gobernador Boekhoudt, prome minister Evelyn Wever-Croes, minister di Finanzas Xiomara Ruiz-Maduro, y ministro di Husticia mr. Andin Bikker. Tambe a haci un bishita na Cruz Cora, pa pone nan mes na altura di e situacion di refugiado manera e organisacion aki ta evalua esaki. Minister Ollongren, cu ta riba su prome bishita pa siña conoce e islanan, a hiba palabra en corto pa relata di e bishitanan haci, y a laga mas tanto na secretario di estado Knops pa bay mas den detaye y contesta e mayor parti di e preguntanan, como e responsabel directo pa e area di asunto di Reino.
Un di e asuntonan trata tabata e tema di refugiado Venezolano na Aruba. Realmente no tin tanto cambio den e puntonan di bista cu tabatin anteriormente, unda Aruba ta urgi pa yega na un bon preparacion, cu compromiso concreto financiero di banda Hulandes. Knops a referi na e reciente bishita di un delegacion parlamentario na Hulanda y Bruselas pa discuti posibel apoyo financiero. E no tabata desea di bay den detaye ya cu segun Knops e mester atende asunto cu gobierno (poder ehecutivo), y no cu parlamentario. Ta na gobierno pa presenta un plan a base di cual por tuma decision. Riba pregunta di prensa encuanto e ayudo cu a duna Colombia (4 miyon euro) mientras cu Aruba no a haya nada, Knops a splica cu esakinan ta fondo cu no ta pa reparti dentro di Reino y por lo tanto no ta pa duna e islanan.
Riba pregunta di prensa Knops a duna di conoce cu e problema di refugiado, otro cu e asunto di migrante, legal o ilegal, no ta di un magnitud cu esaki ta rekeri medida urgente y ta keda primariamente un asunto pa Aruba maneha. Si e ta completamente di acuerdo cu mester anticipa y prepara bon riba posibel situacion di emergencia cu por surgi.
Un di e temanan cu a bin dilanti tabata e deseo di gobierno di Aruba, manera divulga na prensa recientemente, pa por fia placa a traves di Hulanda na un interes hopi abao, y asina baha e suma di interes cu ta pagando anualmente (Afl. 230 miyon)y cu ta un peso grandi riba presupuesto di gobierno. Knops a referi na e protocol cu a firma cu Aruba, den cual tin condicionnan stipula cu cual Aruba mester cumpli. A pesar cu Knops a duna cierto elogio na e gabinete pa e manera cu ta atende e asuntonan financiero, segun Knops e momento no a yega ainda cu ta cumpliendo cu e condicionnan. E condicionnan ta formula den e protocol y na su momento lo mester evalua a base di esakinan. Por lo tanto esey, fia na interes abao, no ta al caso ainda. (Ta referi aki e.o. na e normanan pa deficit y surplus pa e añanan 2019 – 2021 cu no ta cumpli ainda; red.).
Bon Dia a haci pregunta tambe riba e gastonan di personal como e aspecto mas preocupante den e situacion financiero, unda cu por observa cu e austerisacion ta asina minimal, cu no tin espacio pa mehora e aparato gubernamental, a traves di contratacion di suficiente profesional pa por mehora. Knops a contesta cu en general lo ta recomendable pa corta gasto di tal forma cu ta crea e posibilidad pa inverti tambe den mehoracion. Sin embargo, ta keda na gobierno di Aruba pa dicidi unda ta corta gasto.
Pa loke ta e tema di derecho humano, aki minister Ollongren mes a tuma palabra, pa comenta riba e preguntanan di prensa, unda a referi na e rapport di AIV (Adviesraad Internationale Vraagstukken) di 2018 unda ta constata cu tin diferencia grandi den implementacion di e tratadonan, entre Hulanda y e islanan autonomo (Aruba, Curaçao, St. Maarten). Ollongren a bisa cu esaki ta asuntonan cu mester haci conhuntamente. Ora firma tratado riba e temanan aki, ta importante y indispensable pa percura pa debido implementacion, den legislacion y den cumplimento tambe. Pa Ollongren, derecho humano ta tema cu mester atende cu seriedad. Por tin diferencia di opinion den implementacion di esaki, pero esey ta semper, y no ta motibo pa no traha cu otro y percura pa tin cumplimento debido di e tratadonan.
Awe (diamars) e delegacion Hulandes lo ta na Bonaire, pa despues termina e bishita na Curaçao riba diaranson.
