ORANJESTAD –Minister Otmar Oduber y RDA a firma un Memorandum of Understandding (MOU) pa asina haya e terenonan bek cu no ta wordo uza pa Citgo.
Recientemente e mandatario conhuntamente cu henter e team di Infra y Bureau di minister Chris Romero a tene un bishita na Refineria di Aruba (RDA) pa mira e propiedad/ tereno cu ta den uzo awor aki di RDA y cu cierto di e terenonan tambe ta forma parti di e contract cu Citgo. Entre e terenonan aki tin terenonan cu no a wordo otorga na Citgo.
A haci un inventarisacion hunto cu DIP, DOW y Kadaster, caminda cu a bay mira e sitio y posibilidad pa diferente plan pa pariba di nos isla. Minister Oduber a papia tambe riba e posibilidad di mira mas pronto cu ta posibel cu cierto momento ta cuminsa ‘ruim op’ e area pa e comunidad di San Nicolas por mira e direccion cu gobierno kier bay.
Manera treci den media na diferente ocasion, comunidad por a tuma nota cu minister Chris Romero ta druk cu tur e detayenan conhuntamente cu minister Andin Bikker, pa loke ta e Fast Ferry. Ya caba gobierno ta den proceso di institucion di e Ports Authority na San Nicolas cu lo mester bay encarga cu e maneho di esaki. Por cierto e topico aki tambe tabata un topico cu a trata den e reunion cu San Nicolas Business Association (SNBA) recientemente. SNBA tambe ta mira cu nan por tin un rol den e desaroyo cu por tin di e waf y posibilidanan nobo pa centro di ciudad na San Nicolas. Por ultimo, minister Oduber a gradici sr. Koolman cu hunto cu su ekipo a bay den henter e facilidad, caminda cu por a identifica diferente area cu lo por ta areanan cu potencial sumamente positivo pa futuro. Ta mustra cu tin e boluntad y interes pa coopera cu gobierno, pa cual aworaki ta den e fase di cierto estudionan cu a pidi pa wordo haci, pa den e proximo 2 pa 3 simannan lo reuni un bes mas cu otro y cuminsa fiha e pasonan cu ta bay tin den futuro.
