Ayera durante un conferencia di prensa cu minister Otmar Oduber a papia tocante e Ley di Destaho Publico cu siman pasa a wordo aproba den parlamento.
Tocante e Ley di Destaho Publico minister Oduber a splica cu e ley aki ta atende cu e forma cu destahonan ta tuma luga mediante e ley di contabilidad, esaki ta hopi importante segun minister Oduber pa motibo cu pa e ultimo añanan hopi hende a cuestiona y a laga un interpretacion habri pa cu e forma di destahonan ta tuma luga.
El a bisa cu ta existi tres forma cu e gobierno por cumpra productonan for di pafo y esaki ta algo cu ta atende cu henter e aparato di gobierno, esaki ta cay specificamente pa companianan estatal di gobierno of Sui Generis cu ta atende nan mes pa loke ta trata ‘Good Governers’ y naturalmente nan tin nan mesun sistema di contabilidad cu ta tuma luga dentro di empresa, pero sigur pa tur departamento di gobierno cu na final di dia ta cumpra productonan y servicionan cu presupuesto di pais Aruba, esaki tin cu tuma luga mediante e ley di contabilidad.
Un di e tres forma cu por cumpra productonan y servicio ta esun cu ta bou un suma di 10.000 florin caminda cu por cumpra esaki a traves di un oferta y despues ta cera cu Aanvraag formulier y despues via un inkoop orde pa cumpra esaki for di diferente instancianan. E di dos ta cu un persona ta haci un onderhandse aanbesteding cu ta determina anteriormente entre un suma di 10.000 pa 100.000 florin cu minimo mester invita tres compania pa por cumpra pa carga e servicio of producto cu lo kier cumpra y di tres ta riba di 100.000 florin cu lo mester bay via un destaho publico.
Minister Oduber a informa cu e cambionan principal cu a tuma luga siman pasa ta hecho cu e grens a cambia pa por haci e forma di tuma decision y duna un flexibilidad mas amplio di loke tin na e momentonan aki, pero e ley di contabilidad tabata duna oportunidad mediante un decreto ministerial cu el a bisa cu ta e cambio mas grandi cu nan a haci awor.
Minister Oduber a expresa cu e mayoria di e proyectonan grandi ta pasa via di DOW y pa hopi biaha via di e aanbesteding aki y esey ta importante cu pa tur hende y companianan mester ta na haltura di e cambio di leynan aki.
