Den luna di augustus, Bon Dia Aruba a publica informacion cu a yega na su mesa di redaccion di forma anonimo tocante malcontento di algun trahado na Hospital Dr. Horacio Oduber, indicando cu ta existi bullying di parti di director di hospital.

Segun e informacion mes tabata indica, e director tambe ta terorisa dokternan Arubiano te cu hasta nan ta tuma nan retiro pa no paga nan e pakete cu nan merece.

Den e mesun liña, Bon Dia Aruba a publica un articulo cu e titulo “Anestesiologo Ike Posner ta lamenta retiro di Dr. Babet Latour Lamers pa atakenan personal y profesional” na unda anestesiologo Posner, mediante varios post riba Facebook, a lamenta cu “Aruba ta perde un briyante strea di atencion medico.” Esaki pa motibo di retiro di specialista den oncologia ginecologico, Dr. Babet Latour-Lames.

Mirando e acusacionnan serio cu a bin pa dilanti contra e director di hospital den e mesun luna, reportero di Bon Dia Aruba e tempo aya a acerca Minister di Salud, Dangui Oduber y a puntra si e ta na altura di e situacion y si tin pensa di haci un investigacion.

Minister Oduber a indica cu cualkier keho cu wordo entrega, hospital tin su Hunta di Supervision, Raad van Toezicht, cu ta consisti di siete miembro cu lo encarga di esaki. “Ta tarea di e Hunta di Supervision si tin keho contra e maneho cu ta wordo hiba na hospital, y sigur mi tin confiansa den e Hunta di Supervision cu nan lo sa di atende cu esaki,” el a bisa.

Durante conferencia di prensa di ayera, reportero di Bon Dia Aruba a puntra Minister Oduber si tin un actualisacion di e situacion aki.

“A base di e kehonan anonimo cu a wordo entrega, obviamente Raad van Toezicht di hospital a haci un investigacion referente e kehonan anonimo aki y e conclusion di e investigacion tabata cu no tabatin ningun base pa tuma ningun decision contra e director,” el a splica den su contesta.

E mandatario a remarca cu Raad van Toezicht di hospital a informa cu no tabatin ningun prueba concreto cu lo por a tuma accion contra e director. El a agrega cu despues di e keho anonimo cu a wordo entrega nan no a ricibi ningun keho mas cu ta substancia e ponencianan cu a wordo treci pa dilanti. “Na final di dia, despues di e investigacion a conclui cu nan no por substancia y prueba y e tabata un keho anonimo. Te dia di awe nos no sa for di cual skina e kehonan aki a bin,” el a finalisa.