Diamars cu a pasa, Minister Dangui Oduber a ricibi bishita di tres studiante di e facultad di (OGM) Organization, Governance and Management na Universidad di Aruba. Nan a bin di bishita pa haya mas informacion tocante e maneho cu ta hiba na Ministerio di Salud Publico en conexion cu prevencion. Pa esaki Minister Oduber a comparti algun informacion tocante iniciativanan plania pa e mehoracion di salud na Aruba. Tambe a elabora na e studiantenan tocante e parti financiero di salubridad na Aruba.
E studiantenan ta enfocando nan estudio riba e topico di “Obesidad na Aruba”. Aruba ta conoci pa tin un porcentahe halto di obesidad, locual ta un topico cu Ministerio di Salud Publico ta trahando riba dje pa asina por yega na tin un pueblo saludabel y pa mantene e fondo di AZV sostenibel. Tocante esaki, Minister Oduber a haya e oportunidad pa informa y intercambia informacion tocante proyectonan importante andando pa loke ta e plan di prevencion pa nos ciudadanonan.
Minister Oduber a menciona diferente proyectonan y tambe diferente organisacion cu tin actualmente na Aruba, cu ta trahando ariba mehoracion di pueblo su salud. Instancianan manera Aruba Healthy Lifestyle Center, Scol Saludabel, Jump 18, Improving Lives Together, pa menciona un par. Pronto tambe lo lansa un aplicacion nobo cu yama Health App.
Minister Dangui Oduber a finalisa bisando cu e ta admira studiantenan cu ta bin cu iniciativa y cu ta scoge e sorto di topiconan aki pa nan proyecto di scol. Topiconan manera obesidad y prevencion den e salud publico na Aruba ta importante adresa y aborda.
