Durante un conferencia di prensa diahuebs atardi Minister di Salubridad y Tursimo, Sr. Dangui Oduber a anuncia cu den cuadro cu e campana di vacunacion, lo tin di cuater vacunathon durante e fin di siman aki. E vacunathon #4 lo tuma luga e dianan 11 y 12 di september na e ballroom di hotel Ritz Carlton entre 9 di mainta y 4 di atardi.
Min. Oduber a splica cu den e e ultimo simannan e situacion ta mehorando. E cantidad di caso pa dia y e averahe pa siman ta bahando, pero e situacion na hospital si ta keda uno preocupante. Actualmente na Aruba tin 10 persona den ICU, tin 26 pashent riba e departamento di COVID y tin 24 pashent cu a wordo manda Colombia cu na e momentonan aki ta den cuido intensivo, esaki ta un cantidad substancial di pashent cu mester tratamento y cuido medico.
El a subraya tambe cu luna di augustus tabata e luna cu mas persona a fayece di COVID-19. Esaki ta debi na e variante Delta cu ta uno mas contagioso y mas peligroso tambe. Mirando e situacion, Min. Oduber ta enfatisa e importancia di vacunacion: “P’esey ta asina importante pa nos por keda recomenda y stimula tur persona cu pa un motibo of otro ainda no a tuma nan vacuna y conscientisa nan, brinda informacion di un manera transparente di e importancia di bay vacuna”.
Min. Oduber a informa cu durante e vacunathon #3 mas di 3 mil persona a tuma nan prome dosis y aworaki a yega na un porcentahe di tur persona riba 18 aña cu a haya nan vacuna ta na un porcentahe di 68%. “Ainda nos no a yega e meta cu nos a pone nos dilanti ora nos a cuminsa cu nos programa di vacunacion. nos a bisa semper cu nos deseo ta pa nos vacuna 85% di nos comunidad pa nos por crea e herd immunity cu ta asina importante pa nos por logra vence e pandemia”, el a bisa.
Pa locual ta e eficiencia di e vacuna, el a indica cu di e 40 fayecidonan cu tabatin na Aruba desde 1 di juli te cu 31 di augustus, 85% no tabata vacuna y 15% si tabata vacuna. E 15% cu si a vacuna, cu a fayece, tabata sufri di otro condicionnan fisico.
Min. Oduber a splica tambe con e variante Delta tambe ta afectando e turismo di Aruba.
Den luna di juni y juli turismo a crece substancialmente y den luna di augustus ya caba por a cuminsa sinti e efecto di e variante Delta. “Nos a experiencia un caida di 15 mil turista den luna di augustus. Nos ta mira cu e ocupacionnan den hotel tambe a mira un reduccion di entre 3% y 5% y nos ta conclui cu e variante Delta a afecta nos recuperacion bastante”, el a señala.
Señora Jurette Maduro, Comunicatie Adviseur di DVG, a duna informacion y splicacion tocante e vacunathon #4, ken por vacuna y ken no por bin na remarca pa tuma nan vacuna. Tur persona di 12 aña bay ariba por acudi na e vacunathon y el a enfatisa cu e 3 mil personanan cu a vacuna durante e vacunathon #3, pa pasa den e weekend aki na e ballroom di Ritz Carlton y asina ricbi nan segundo dosis.
Ta importante ta remarca cu tur persona cu kier vacuna mester presenta cu nan Health App of nan carchi di AZV. Pa locual ta e muchanan cu a acudi na e vacunathon 3 siman pasa cu nan mayor, pa nan segundo dosis nan no mester bin cu nan mayor, mayor por compaña nan si pero no ta obligatorio ya cu e muchanan ta registra caba. Pa e prome dosis di e mucha si ta necesario pa e mayor ta presente.
Sra. Maduro a informa tambe cu no solamente residente di Aruba por vacuna pero tambe e persona cu no ta residente. Si un persona no residente tin mas cu 6 luna bibando na Aruba y e tin permiso den tramite of no tin permiso of e permiso a caduca, esaki no ta problema. “Si bo tin mas di 6 luna ta biba na Aruba y bo por prueba cu bo ta biba na Aruba pa mas cu 6 luna bo por bin vacuna. Durante e vacunathon HIAS lo tey presente pa contesta tur pregunta di tur persona cu no ta residente di Aruba pa wak si nan ta bin na remarca pa vacuna of no”, el a splica.
E personanan cu no ta residente mester presenta cu nan paspoort pa asina verifica cu nan no ta turista pero cu nan ta biba na Aruba.
Sra. Maduro a informa tambe cu tin algun excepcion pa personanan cu no ta residente. Locual ta studiantenan Arubiano cu ta na Aruba di vakantie por vacuna, personanan cu nacionalidad Hulandes cu ta na Aruba pa un luna of mas tambe por vacuna y studiantenan cu ta core stage na Aruba y nan tin prueba di nan stage, nan tambe por vacuna.
E personanan cu no por vacuna durante e vacunathon ta hendenan cu tin sintoma di griep cu por ta parecido na COVID-19, turistanan tampoco por vacuna, y si e persona tin un test di COVID-19 positivo cu ta menos cu 8 siman bieu tampoco no por vacuna.
Durante e vacunathon lo tin e vacuna Pfizer y Johnson & Johnson disponible. Personanan cu kier e vacuna Johnson & Johnson mester pidi pa esaki. Ta importante pa remarca cu Johnson & Johnson ta wordo duna solamente na adulto di 18 aña bay ariba y e no por wordo duna na hende muhe na estado tampoco. E muchanan entre 12 y 18 aña lo ricibi e vacuna Pfizer.
Por ultimo Min. Oduber y Sra. Maduro a extende invitacion na comunidad di Aruba cu no a vacuna of cu tin solamente un dosis, pa asisti na e vacunathon #4 e weekend aki y asina contribui den e lucha contra COVID-19.
