Durante un conferencia di prensa cu a tuma luga ayera mainta, Minister di Salud Publico y Turismo, Dangui Oduber a anuncia e adkisicion di dos ambulance nobo pa Cuerpo di Ambulance di Aruba.

Prome cu haci e anuncio aki, Minister Oduber a repasa e maneho di Ministerio di Salud pa cu cuido medico. El a splica cu for di ora Gabinete Wever-Croes a drenta gobierno na 2017 e enfoke ta dirigi na mehoracion di e calidad di cuido y servicio, haci inversionnan continuo den cuido medico, percura pa reduci e lista di espera, mantene e gastonan medico pagabel y tambe percura pa e garantia cu e fondo di AZV ta keda sostenibel.

Un punto principal cu e minister a mencion cu tambe ta den nan maneho ta prevencion di salud. Ministerio di Salud a lansa e Plan Nacional di prevencion como e prome pais den Caribe cu tin un Plan Nacional di Prevencion. A desaroya esaki conhuntamente cu PAHO y cu tur stakeholder den cuido medico na Aruba.

A pesar cu e pandemia a pone cu tabatin un retraso di dos aña, Minister Oduber a sigura cu na e momentonan aki nan ta cla pa ehecuta e Plan Nacional di Prevencion.

“Si tur cos ta bon den fin di luna aki nos ta bay lansa oficialmente e Aruba Healthy Lifestyle Center cu ta dirigi pa yuda tur esnan cu tin problema di salud y problema di peso pa asina nos por haci un intervencion pa garantisa nan un miho calidad di bida y tambe naturalmente percura pa maneha e gastonan den cuido medico,” el a indica.

Oduber a enfatisa cu no ta un secreto cu e retonan den salud publico ta grandi. Aruba ta biba den un comunidad cu ta sufri di dubbele vergrijzing, un grupo grandi den comunidad no ta esnan di mas saludabel y hopi di esnan di e grupo aki ta sufri di malesanan cronico.

Adicionalmente el a menciona cu mundialmente nan ta nota cu e gastonan di cuido medico ta subiendo tur caminda rond mundo y na Aruba esaki tambe ta e caso y mester agrega na esaki e scarsedad grandi di e personal medico.

No obstante tur e retonan aki, el a sigura cu nan ta traha hopi di cerca cu AZV, cu ImSan y HOH, e prome y di dos liña di cuido pa asina percura pa e maneho cu nan a cuminsa den e periodo di gobernacion di Gabinete Wever-Croes II, percura pa esaki wordo ehecuta na bienestar di cuido medico y sigur na bienestar di tur e aseguradonan di AZV.

“Conforme e maneho di Ministerio di Salud cu ta dirigi entre otro haci inversionnan continuo den cuido, no obstante tur e retonan financiero cu AZV tin y tambe pais Aruba tin, nos a haya espacio pa den aña 2023 haci varios inversion den cuido medico pa asina nos mehora e cuido y servicio,” Minister Oduber a subraya.

Den e contexto aki el a anuncia cu por medio di AZV nan ta bay financia e compra di dos ambulance nobo cu ta conta cu e tecnologianan mas moderno, un ambulance cu na aña 2018 nan a haci compra di dje caba y aworaki nan a tuma e decision pa haci compra di dos ambulance mas mesun cos.

Segun e planificacion, e ambulancenan lo mester yega Aruba den e di tres kwartaal. E intencion ta pa reemplasa dos ambulance cu no ta den e mesun condicion pa asina tin tres ambulance cu ta den super bon condicion y cu e tecnologianan mas moderno.

“E ambulancenan aki ta hopi importante pa diariamente e personal di ambulance por brinda un excelente servicio na tur e pashentnan cu ta wordo trata diariamente. Diariamente nan ta scapa sigur bidanan ser humano, esey ta nan tarea principal y esey ta e tarea principal di e personal y esey ta e motibo tambe pakico e ambulancenan ta wordo usa. Pa scapa mas bida di hende posible,” el a remarca.

Minister Oduber a haci uso di e ocasion pa gradici e personal di ImSan, gradici e personal di ambulance, cu manera ya caba el a menciona ta haci un excelente trabou, specialmente den dianan di fiesta, den momentonan cu tin hopi presion riba nan trabou y sobretodo durante e ultimo dos añanan aki atendiendo e miles di pashentnan cu COVID-19.

“Nos kier a expresa nos gratitud como Ministerio di Salud pa tur e trabounan cu nan ta haci pa scapa bida di ser humano na Aruba,” el a expresa.

Por ultimo Minister Oduber a informa comunidad ariba e situacion di COVID-19 na Aruba. Por tuma nota cu e situacion mundial por mira cu tin varios pais ta confrontando retonan di COVID-19. Na Aruba tabatin rumor cu tin mas di mil caso activo di COVID-19. Segun minister Oduber ta sigura, esey no ta e caso. “E situacion na Aruba ta totalmente bao di control. Nos no kier pensa cu nos lo yega eynan atrobe, esey no ta e caso tampoco,” el a enfatisa.

El a remarca cu naturalmente DVG ta sigui e situacion di cerca y ta haci e monitoreo necesario, pero el a desmenti e rumor cu na Aruba tin mas di mil caso di COVID-19. El a comenta cu siman pasa tabatin apenas 20 caso.

E minister a agrega cu Aruba a sali for di pandemia na luna di maart aña 2021 cu un exit strategy hopi exitoso y riba e mesun ritmo, riba e mesun rumbo nan kier keda, pero mas cu claro lo keda monitor e situacion.

Pa finalisa Minister Oduber a gradici Sr. Edwin Jacobs, director di AZV, pa kere den e vision y maneho di Ministerio di Salud y asina percura pa busca e financiamento necesario pa e compra di e dos ambulancenan aki. “Dentro di e siguiente simannan y lunanan nos dilanti nos ta bay haci varios anuncia importante pa cuido medico den cuadro di e maneho y vision cu nos ta hibando pa haci inversionnan necesario den cuido medico pa mehora e calidad di cuido y servicio cu nos ta duna na nos aseguradonan,” el finalisa.