Recientemente a tuma luga e firma di un acuerdo di cooperacion (MoU) entre e dos instancianan di cuido medico na Aruba, HOH y ImSan. Durante e conferencia di prensa a toca varios tema relaciona na e acuerdo di cooperacion como tambe cuido medico. Un temanan cu a toca y cu ta uno cu ta resalta hopi pa comunidad completo ta lista di espera y falta di personal specialisa.

Sr. Edwin Jacobs, director di AZV, a indica cu banda di e aspecto financiero, e sostenibilidad financiero di e sistema di cuido na Aruba, e sostenibilidad di personal tambe ta un aspecto hopi importante.

El a splica cu e aña aki, a pesar di e situacion fastiso cu e fondonan disponibel, nan a logra crea espacio y a pone fondo disponibel pa asina traha pa reduci lista di espera, pero te aworaki, segun el a indica, nan no ta logrando y no pa motibo di falta di medio e biaha aki, pero pa motibbo cu e institutonan no ta logra haya e specialistanan necesario pa duna un man den esaki.

“Esaki e proximo añanan ta bira mas agudo pasobra e ta un problema mundial. Na tur parti di mundo cu conoce envejecemento”, el a remarca.

Jacobs a señala cu e acuerdo di cooperacion entre ImSan y HOH por haci fasil pa nan por reorienta nan mes tambe for di unda nan por bay busca e specialistanan necesario pa asina por brindanan e apoyo y ayudo den e reto aki y alaves tambe por forha e cooperacion internacional.

“Nos ta conciente cu tin biaha pa bo yega na un punto di eficiencia bo mester inverti y pa e proximo añanan nos mester reserva fondo ariba e presupuesto di AZV dedica na reformacion di e cuadro ey pa por yega na e punto di bon cooperacion entre e dos isntancianan aki”, Jacobs a apunta.

Minister di Salud y Turismo, Dangui Oduber a remarca tambe cu intencion y meta di e acuerdo di cooperacion entre HOH y ImSan ta pa yuda cu e falta di personal specialisa tambe. El a subraya cu AZV a pone e fondonan disponibel pa por busca e specialistanan necesario pa reduci e lista di espera, pero e reto grandi ta cu no solamente na Aruba, pero mundialmente, tin escasez grandi di speicalistanan medico.

Oduber a splica a duna como ehempel cu tin un decreto ministerial pa firma di un specialista cu a wordo busca for di Russia pa bin traha na Aruba pa asina yuda den e retonan cu tin pa loke ta trata e escasez di specialistanan medico ariba e isla.

El a enfatiza cu den e situacion actual no necesariamente nan tin placa pa buscanan, pero AZV tin un presupuesto aparta pa busca e specialistanan aki pa yena tur e vacaturanan, pero segun el a indica, nan no ta hayando specialista manera nan ta desea.

“E no ta asina fasil. Aruba tin e retonan aki, Hulanda tin e retonan aki, Merca tambe, tur pais na mundo tin e mesun reto aki cu ta escasez mundialmente y esey ta pone un peso grandi riba cuido medico pasobra bo lo kier trata tur hende manera cu nan ta constata un diagnostico pa wordo trata, bo lo desea di tratanan e mesun siman, pero lamentablemente nos no ta logra esey pasobra tin escasez y bo no ta haya specialistanan manera cu bo kier”, el a comenta.

Otro reto cu tin ta pa dokternan di cas. Den luna di juli Huisartsenvereniging Aruba (HAVA) a publica ariba medio social un publicacion na unda nan ta señala e problematica di falta di dokter di cas na Aruba.

Den nan publicaicon e organisacion ta indica cu cada consultorio di dokter di cas na Aruba tin un promedio di 2.300 patient inscribi, mientra cu na Hulanda e cifra aki 2.095.

Nan ta remarca cu sigura cu e pashent por haya e calidad di cuido cu e mester di su dokter di cas, stakeholders mester traha hunto pa por realisa un cantidad di pashent cu e dokter di cas por maneha na un manera sostenibel.

“HAVA su dokternan di cas kier yega na un situacion unda no ta sobrecarga e sistema di cuido primario, pa nan tambe como specialista den nan trabou brinda e servicio cu nan por. E experiencia aworaki ta cu door di e ampliacion di e cantidad di cuido cu ta wordo pidi, extra responsabilidad administrativo y exigencianan di calidad, no ta resta suficiente tempo pa cada pashent haya e atencion cu nan merece. Esaki ta preocupante y ta locual HAVA ta pidi atencion pe”, e publicacion a resalta.

Relaciona na e problema di falta di dokter di cas na Aruba, Minister Oduber a enfatisa durante e conferencia di prensa cu dokternan di cas tin hopi presion y mester mas dokter di cas. El a splica cu pa yuda cu e problematica aki, AruBig ta cay aden. AruBig ta e sistema caminda ta reconoce yiunan di tera of dokternan cu a studia na cierto universidadnan na Colombia of Costa Rica cu ta acredita y a traves di AruBig nan por bin traha na Aruba.

El a agrega cu recientemente AZV mes a cera contract cu un of dos dokter cu a studia na Universidad Del Bosque na Colombia pa bin traha na Aruba. E cokternan ta cuminsa corre como un tipo di stage cerca e dokternan di cas pa siña e cultura, pa siña con e dokternan di cas ta practica na Aruba y despues nan mes por brinda e servicio na e pashentnan. “Kiermen e AruBig a yuda nos den e parti di dokternan di cas pa baha e presion cu tin riba nan aworaki”, el a señala.