Manera ta conoci caba, desde 1 di januari 2023 dump di Parkietenbos a cera pa publico. Alabes por a nota cu den e dianan despues di e ceramento, tin mas y mas dump ilegal rond Aruba. Durante conferencia di prensa ayera mainta, Minister Dangui Oduber, como Minister di Turismo, a ricibi e pregunta for di miembro di prensa tocante e situacion di dumpmento di sushi ilegal rond di e isla.
Minister Oduber a contesta splicando cu tabatin un campaña di conscientisacion pa cu e ceramento di dump y pues naturalmente esaki ta nifica un cambio grandi pa comunidad. “Pa decadanan largo comunidad a custuma di hiba nan sushi dump y desde 1 di januari esaki ta cera. Y bo ta wak cu esaki den cierto areanan a ocasiona dumpmento di sushi ilegal cu naturalmente tin nos atencion y preocupacion. Nos ta biba di turismo, esey ta nos unico pilar economico,” el a enfatisa.
El a sigui splica cu den bon cooperacion cu fondo di TPEF, DOW y Serlimar y tambe Departamento di Medio Ambiente, nan ta atendiendo cu e retonan aki pa garantisa cu por atende cu tur caminda unda tin dumpmento di sushi ilegal.
Minister Oduber a haci yamada na comunidad tambe pa yuda combati e dumpnan di sushi ilegal cu ta formando na diferente parti di Aruba. “Nos ta pidi comunidad tambe e cooperacion necesario, señala esaki mesora riba social media of riba e app cu a wordo lansa pa colega Minister (di Naturalesa, Ursell) Arends, e app cu yama FIXI.”
Ariba e plataforma FIXI por meld dumpmento di sushi ilegal pa asina Bureau City Inspector atende cu esaki sea cu Serlimar of DOW pa garantisa un Aruba limpi cu no tin dumpmento di sushi ilegal.
E plataforma FIXI, cu ta disponibel den cualkier smartphone, unicamente e persona mester download e aplicacion for di Apple Store of Google Play y crea un perfil di usuario, den otro caso tambe por saca e potretnan di e luga y reporta esaki riba e website www.fixi.aw
Proceso di raporta ta facil, e usuario mester observa un situacion, saca potret, skirbi un reportahe cortico di e situacion, manda e reportahe, Bureau City Inspector (BCI) e instancia encarga pa dirigi e aplicacion ta ricibi esaki y redirigi e rapport pa instancia concerni si ta necesario.
Si bo observa cualkier di lo siguiente, lo bo por raporta esaki cu FIXI; dump ilegal of hende ta deshaci di sushi ilegalmente, hende ta deshaci awa preto riba tereno publico of den dam, hende ta deshaci di kimico riba tereno publico, si ta sospecha individual of compania di deshaci di kimico peligroso (venenoso) riba tereno publico, of riba tereno priva sin tin permiso y wacharaca di auto riba tereno publico.
Por ultimo Minister Oduber a enfatisa cu di Parti di Ministerio di Turismo nan a reuni cu TPEF y DOW y tambe a manda e mensahe pa Serlimar pa asina atende cu e problematica aki na un forma integral.
